Þyrluflugmaðurinn sem flutti Michael Schumacher á sjúkrahús eftir alvarlegt skíðaslys hans árið 2013 hefur í fyrsta sinn sagt frá reynslu sinni af björgunaraðgerðinni.
Schumacher, sem er einn sigursælasti ökumaður í sögu Formúlu 1, hlaut alvarlegan heilaskaða þegar hann féll á skíðum í frönsku Ölpunum í desember 2013.
Yannick Dainese starfaði þá fyrir björgunarþyrlufyrirtækið SAF Hélicoptères og tók þátt í að flytja Schumacher á sjúkrahús. Í viðtali við franska íþróttablaðið L'Équipe rifjar hann nú upp hvernig hann fékk fyrst fréttirnar.
„Björgunarmaður stökk út úr þyrlunni með lækninum og sagði við mig: „Við erum að fara til Schumachers!“.“
Dainese segist fyrst hafa haldið að verið væri að gera grín að sér.
„Í fyrstu hélt ég að hann væri að grínast. En þegar yfirmaðurinn skipaði okkur að taka af okkur hljóðnema og GoPro-myndavélar og banna blaðamönnum að fylgja með, þá áttaði ég mig á að þetta var satt.“
„Fyrir mér var hann bara alvarlega slasaður maður“
Þótt Dainese segist ekki vera mikill aðdáandi Formúlu 1 vissi hann vel hver Schumacher var.
„Ómeðvitað var ákveðin pressa til staðar því ég vissi að hann var nánast dýrkaður eins og guð. En fyrir mér var hann bara enn einn maðurinn sem var alvarlega slasaður.“
Schumacher var haldið sofandi í sex mánuði eftir slysið. Síðan þá hafa mjög fáar upplýsingar verið birtar um heilsufar hans og hann hefur ekki sést opinberlega frá slysinu.
Talið er að hinn sjöfaldi heimsmeistari búi nú á heimili fjölskyldunnar við Genfarvatn þar sem hann nýtur stöðugrar umönnunar sérhæfðs læknateymis. Aðeins örfáir einstaklingar utan nánustu fjölskyldu hafa fengið að heimsækja hann á þeim þrettán árum sem liðin eru frá slysinu.
Sjúkrahúsið breyttist í Formúlu 1 braut
Dainese segir að hann hafi snúið aftur á sjúkrahúsið nokkrum dögum síðar vegna annars verkefnis og orðið hissa á umfangi fjölmiðlaumfjöllunarinnar.
„Nokkrum dögum eftir slysið fór ég aftur á sjúkrahúsið til að flytja annan slasaðan einstakling.“
„Það sem ég sá kom mér í opna skjöldu. Það voru rútur út um allt, rauðir fánar og fólk á hverju strái. Sjúkrahúslóðin hafði breyst í eins konar Formúlu 1 braut. Það var ótrúlegt.“
