Orðaskipti brutust út á samfélagsmiðlum milli Stefáns Einars Stefánssonar, blaðamanns á Morgunblaðinu og stuðningsmanns Sjálfstæðisflokksins, og Björns Levís Gunnarssonar, fyrrverandi þingmanns Pírata, vegna fyrirhugaðrar þjóðaratkvæðagreiðslu um aðildarviðræður Íslands við Evrópusambandið.
Stefán gagnrýndi áform ríkisstjórnarinnar harðlega og vísaði til fréttar þar sem fram kom að fleiri Íslendingar hefðu aldrei á síðustu 16 árum sagst alfarið andvígir inngöngu í Evrópusambandið en nú. Hann skrifaði að ríkisstjórnin hygðist „sækja um aðild að Evrópusambandinu í bullandi ágreiningi“ og benti á að forsætisráðherra hefði fyrir kosningar talað um að slík vegferð yrði ekki farin nema í breiðri sátt, meðal annars við aðila vinnumarkaðarins.
Björn Leví svaraði og sagði Stefán fara rangt með málið. Hann lagði áherslu á að ekki stæði til að sækja um aðild að Evrópusambandinu heldur að halda þjóðaratkvæðagreiðslu um hvort hefja ætti aðildarviðræður.
„Nei, það er verið að halda þjóðaratkvæðagreiðslu um hvort það eigi að sækja um aðild. Tvennt ólíkt. Algjör óþarfi að reyna að snúa út úr. Það er óheiðarlegt,“ skrifaði Björn og bætti við að niðurstaða slíkrar kosningar yrði einfaldlega lýðræðisleg, hvort sem meirihlutinn samþykkti eða hafnaði því að sækja um aðild.
Stefán lét svar Björns ekki óátalið og skrifaði: „Hlífðu mér kæri Björn. Ég er með ofnæmi fyrir vitleysu.“
Björn svaraði þá aftur með háði og sagði: „Þá verð ég því miður að tilkynna þér að þú ert með sjálfsofnæmi.“ Hann ítrekaði að ríkisstjórnin væri ekki að sækja um aðild heldur hygðist leggja spurninguna um aðildarviðræður í hendur kjósenda.
