Blaðamaðurinn og siðfræðingurinn umdeildi Stefán Einar Stefánsson blæs lífi í samsæriskenningu sem hefur gengið meðal öfgahægrimanna Íslandi undanfarnar vikur.
Í stuttu máli gengur sú kenning út á að núverandi ríkisstjórn, ásamt ákveðnum íslenskum fjölmiðlum, hafi meðvitað gert líf Íslendinga verra til þess að gera inngöngu í ESB meira heillandi.
Í færslu sem Stefán birtir á Facebook ræðir hann frétt sem Berlingske skrifaði um íslenskan sjávarútveg á máta sem siðfræðingurinn er ósáttur við en blaðamaðurinn Emil Eire Frerk Olsen ræddi við 19 heimildarmenn, meðal þeirra eru stjórnmálamenn, sérfræðingar á ýmsum sviðum og fólk sem starfar í sjávarútvegi. Einn þeirra sem Olsen ræddi við er Daði Már Kristófersson, fjármálaráðherra Íslands.
„Þetta er hinn danski Þórður Snær Júlíusson. Maður sem í skjóli blaðamennsku heggur í fólk og samfélög án þess að skeyta um heiður eða skömm. Hann hefur nú ritað dómadagsþvælu í Berlingske sem dregur upp þá mynd af Íslandi að það sé líkast Rússlandi á árunum eftir fall Sovétríkjanna. Hér sé við lýði einhverskonar óligarkía sem stýrt sé af fámennum hópi gjörspilltra manna,“ skrifar Stefán.
„Það er með öllu óskiljanlegt að virtur miðill í Danmörku láti svona lagað frá sér og það geta vart liðið margir dagar uns hann dregur efnið til baka og rekur þennan njóla. Hann er auðvitað í slagtogi við Aðalstein Kjartansson og Helga Seljan sem í undarlegu samkrulli RÚV, Heimildarinnar, áður Stundarinnar og Kjarnans, telja það sitt æðsta og mesta verk að knésetja íslenskan sjávarútveg eins og við þekkjum hann í dag,“ heldur hann áfram.
Stóra planið
„Vegna þess að sú atvinnugrein hefur vaxið að afli og orðið til þess að afla íslensku samfélagi, útgerðarmönnum og sjómönnum auðsældar þá skal allt gert til að sverta hana, meðal annars í augum umheimsins.
Það læðist að manni sá grunur að þetta sé hluti af stærra plani hjá þessu liði. Reyna að veikja stöðu sjávarútvegsins enn frekar í augum almennings á Íslandi, svo fólk sé reiðubúið til þess að kasta honum fyrir róða í von um skjótfenginn gróða af upptöku evru eða 100 þúsund blaðsíðum af regluverki um allt og ekkert milli himins og jarðar.
En það er ömurlegt þegar fjölmiðlamenn ganga fram, af þekkingarleysi eða hreinni meinfýsni og draga upp rammskakka mynd af atburðum eða aðstæðum sem þeim er trúað til að fjalla um. Emil Eire Frerk Olsen fellur í þann fúla pytt að þessu sinni. Það kemur ekki á óvart þegar félagsskapurinn er skoðaður. Fyrir honum fer að lokum eins og Lasse Skytt. Margir muna hvernig þar var reitt til höggs og hvað stóð eftir þegar rykið var sest,“ skrifar Stefán svo að lokum.
