Stephan Vilberg Benediktsson, dóttursonur Stephans G. Stephanssonar, hins svonefnda Klettafjallaskálds, andaðist miðvikudaginn 15. október síðastliðinn í San Miguel de Allende í Mexíkó, 92 ára að aldri. Stephan var mörgum Íslendingum að góðu kunnur og kom oft til Íslands á lífsleiðinni. Mbl.is sagði frá andlátinu.

Stephan fæddist 22. júní 1933 nærri Markerville í Alberta í Kanada, einn af fjórum systkinum. Foreldrar hans voru Rósa, yngsta dóttir Stephans G., og Sigurður Vilberg Benediktsson, einnig af íslenskum ættum. Þegar Stephan var níu ára gamall lést faðir hans, og aðeins 14 ára hóf hann störf við olíuborun, starf sem varð honum ævistarfið.

Síðar lauk hann námi í olíuverkfræði og starfaði á því sviði víða um heim. Hann efnaðist vel og stofnaði eigið fyrirtæki, sem hann seldi þegar hann lét af störfum upp úr síðustu aldamótum.

Stephan var afar stoltur af íslenskum uppruna sínum og minningu afa síns. Hann stofnaði eigið bókaforlag og gaf árið 2012 út enska útgáfu af ævisögu Stephans G. Einnig gaf hann út tvær bækur með skrifum móður sinnar, Rósu, auk tveggja eigin verka, þar sem hann rifjaði upp reynslu sína úr olíuiðnaðinum og velti fyrir sér samfélagsmálum.

Hann og eiginkona hans, Adriana, fædd Kroes, studdu við ýmis menningar- og fræðastörf bæði á Íslandi og í Kanada, meðal annars með því að koma á fót styrk í nafni Stephans G. Stephanssonar við Háskóla Íslands.

Stephan kvæntist tvisvar sinnum. Fyrri kona hans var Audrey Evelyn, fædd Jones, og með henni eignaðist hann þrjú börn: synina Steph­an og David Benediktson og dótturina Susan Abbiati. Síðari kona hans, Adriana, átti fjögur börn úr fyrra hjónabandi: Alfredo, Monica, Lavan og Jonathon. Barnabörn Stephans eru sjö talsins.