Stífla nærri rússnesku borginni Belgorod er farin að leka vatni eftir að hafa orðið fyrir skemmdum í árás úkraínska hersins um helgina, að sögn yfirvalda á staðnum.
Á laugardag greindi Vyacheslav Gladkov, landstjóri Belgorod, frá því á samfélagsmiðlinum Telegram að úkraínsk drónaárás hefði hitt Belgorod-lónsstífluna. Hann hvatti íbúa á svæðinu til að koma sér í burtu og varaði við því að byggðir gætu orðið undir vatni myndi stíflan gefa sig.
„Við gerum okkur grein fyrir því að óvinurinn gæti reynt að gera árás aftur og eyðileggja stífluna,“ skrifaði Gladkov. „Ef það gerist verður hætta á flóðum í flæðiengi árinnar við Kharkív-hérað í Úkraínu og einnig á nokkrum götum í byggðarlögum hér, þar sem um 1.000 manns búa.“ Hann bætti við að neyðarskýli væru tilbúin fyrir íbúa í Belgorod sjálfri.
Telegram-fréttarásin MNS birti myndir sem sýndu afleiðingar árásarinnar síðla á föstudagskvöld. Þar var haldið fram að þrjár HIMARS-eldflaugar hefðu hitt stífluna og tveir hafi slasast. Að sögn rússneskra yfirvalda væri þó engin hætta á að stíflan rofnaði. Samkvæmt yfirmanni Ómannaðrar kerfissveitar hers Úkraínu (e. Unmanned Systems Forces) hafi árásin hins vegar verið gerð með dróna, ekki eldflaugum.
Á sunnudag greindi úkraínski herinn frá því að vatn hefði þegar byrjað að renna út úr stíflunni og að vatnsyfirborð lónsins hefði fallið um einn metra. „Það eru þegar fregnir um að flætt hafi yfir skotgrafir Rússa,“ sagði í skýrslu 16. herdeildar Úkraínu.
„Aðflutningar óvinarins hafa orðið mun flóknari. […] Sveitir sem náðu að komast yfir Siverskyi Donets eru í raun afskornar frá aðalsveitum sínum. Við reiknum því með nýjum föngum í fangaskiptapottinn,“ sagði jafnframt í skýrslunni.
Á mánudag staðfesti rússneska vatnaauðlindastofnunin að vatnsyfirborð í Belgorod-lóninu hefði lækkað um einn metra og að neyðarástand væri í gildi á svæðinu meðan unnið væri að viðgerðum.
„Í kjölfar árásarinnar […] skemmdist neðri útfallið sem stjórnar vatnsrennsli niðurstreymis og báðar lokur glötuðu þéttingum sínum. Vegna þessa hefur vatnsborð lónsins fallið um einn metra,“ sagði í yfirlýsingu stofnunarinnar.
Rússnesk öryggislögregla sagði við ríkismiðla að árás Úkraínu hefði verið „tilraun til að valda manngerðri hörmung“.
BBC greindi á mánudag frá því að miðillinn hefði sjálfstætt sannreynt myndefni af skemmdum á stíflunni á samfélagsmiðlum og að gervihnattamyndir bentu til flóða niðurstreymis vegna skemmdanna.
