Einbýlishús við Logafold 55 í Reykjavík hefur verið sett á sölu fyrir 192 milljónir króna. Húsið er á tveimur hæðum, samtals 384,6 fermetrar að stærð samkvæmt fasteignaskrá HMS, þar af er 35,2 fermetra innbyggður bílskúr. Húsið var byggt árið 1987 og eru möguleg skipti á minni eign.
Um er að ræða timburhús á steyptum kjallara. Efri hæðin skiptist meðal annars í um 50 fermetra stofu, um 20 fermetra borðstofu, eldhús, þvottahús, fjögur svefnherbergi, baðherbergi og fataherbergi. Úr stofunni er gengið út á um 50 fermetra sólpall sem snýr til suðurs og þaðan liggur stigi niður í garð.
Í bílskúrnum er rafknúin hurð og hleðslustöð fyrir rafbíl. Á gólfum efri hæðar eru meðal annars Jatoba-parket, flísar og náttúrusteinn.
Kjallarinn er steyptur og þar eru tvö stór rými, geymsla, tómstundarými, skrifstofuherbergi, forstofa og baðherbergi. Innangengt er á milli hæða en jafnframt er sérinngangur utan frá í forstofu kjallarans.
Skrifstofurýmið hefur verið nýtt undir sjálfstæða starfsemi en önnur rými kjallarans hafa meðal annars verið nýtt til íbúðar, líkamsræktar og tómstunda.
