Upplýsingar úr staðsetningarappinu Life360 benda til þess að bifreið sem fór út af Krýsuvíkurvegi aðfaranótt 31. ágúst hafi náð allt að 233 kílómetra hraða skömmu fyrir slysið en þrjú ungmenni létust í því.
Heimildin greinir frá þessu í ítarlegri frétt um málið og hefur séð myndband úr appinu sem sýnir ferðir bifreiðarinnar.
Tekið er fram í umfjöllun Heimildarinnar að ekki sé hægt að fullyrða um nákvæmni hraðamælingarinnar og því beri að taka henni með fyrirvara.
Samkvæmt gögnunum var bifreiðinni ekið á miklum hraða á stuttum kafla vegarins áður en ökumaður missti stjórn á henni í beygju handan blindhæðar nærri Bláfjallaafleggjaranum. Hámarkshraði á Krýsuvíkurvegi er 90 kílómetrar á klukkustund.
Myndskeið frá vettvangi slyssins hafa einnig gengið manna á milli. Lögreglan á höfuðborgarsvæðinu rannsakar dreifingu myndefnisins og hvetur fólk til að sýna tillitssemi.
„Það er engum hollt að sjá svona myndefni, en svona virðist tíðarandinn vera. Við biðjum fólk um að sýna tillitssemi og aðgát,“ segir Sævar, aðalvarðstjóri lögreglunnar í Hafnarfirði, við Heimildina.
Lögregla rannsakar nú atburðarásina og ræðir við vitni. Sævar segir rannsóknina umfangsmikla. Hann segir jafnframt að svo virðist sem aukning hafi orðið á því að ungmenni hittist á fáförnum stöðum og stundi hraðakstur.
