„Þetta eru dimmir dagar fyrir blaðamennsku.“
Þetta sagði Josh Rushing hjá Al Jazeera í áhrifamikilli þakkarræðu sinni eftir að heimildarmyndin Kids Under Fire hlaut Emmy-verðlaun fyrir bestu umfjöllun um stríð eða ofbeldisátök á News Emmy-verðlaunahátíðinni 2026.
Rushing tileinkaði verðlaunin samstarfsfólki sínu og öðrum blaðamönnum sem hafa verið drepnir á Gaza síðan þjóðarmorðið hófst eftir 7. október.
„Ég vil tileinka þetta þeim 11 blaðamönnum Al Jazeera, þessum 11 samstarfsfélögum, sem Ísrael hefur drepið á Gaza síðan 7. október, og einnig 270 öðrum blaðamönnum sem hafa verið drepnir á Gaza frá 7. október,“ sagði hann í ræðunni.
Sagði kaldhæðni felast í verðlaununum
Í ræðunni gagnrýndi Rushing einnig Bandaríkin harðlega og sagði kaldhæðni felast í því að taka við verðlaunum fyrir umfjöllun um þjóðarmorð í því landi sem hefði gert það mögulegt.
„Það ætti ekki að fara fram hjá neinum kaldhæðnin í því að taka við verðlaunum fyrir umfjöllun um þjóðarmorð í því landi sem gerði það þjóðarmorð mögulegt og hefur haldið því áfram,“ sagði hann.
Rushing minntist einnig lækna sem hefðu yfirgefið þægilegt líf til að fara til Gaza og hjálpa særðum.
Hann sagði suma þeirra hafa áttað sig á því að „sverð sannleikans“ og það að bera vitni gæti verið sterkara en skurðhnífarnir sem þeir komu með á vígvöllinn.
Fjallaði um fjögurra ára stúlku
Blaðamaðurinn nefndi sérstaklega fjögurra ára stúlku að nafni Mira sem kom fram í heimildarmyndinni og hafði fengið kúlu í heilann.
„Vegna þeirra [læknanna] er fjögurra ára stúlkan Mira, sem var með kúlu fasta í heilanum, nú í Mexíkóborg að fá aðstoð ásamt móður sinni, Isra, sem missti fótinn á meðan við vorum að taka upp myndina,“ sagði hann og beygði aðeins af.
Bætti hann síðan við:
„Þetta eru dimmir dagar fyrir blaðamennsku. Annað hvort erum við að hrynja undan fjárhagslegum þrýstingi eða við erum keypt upp af fákeppnisöflum sem taka yfir skilaboðin og móta þau eftir sínum vilja.“
Í lok ræðunnar hvatti Rushing fjölmiðlafólk til að halda áfram að berjast fyrir sannleikanum og mannúð.
„Það getur engin þjóð verið frjáls án frjálsra fjölmiðla. Haldið áfram hinni góðu baráttu.“
