Sólveig Anna Jónsdóttir, formaður Eflingar, segir stöðu verkafólks á húsnæðismarkaði vera óboðlega og stjórnendur samfélagsins sýna algert skeytingarleysi gagnvart vanda launafólks. Þetta kemur fram í færslu sem hún birti á Facebook í morgun.
„Ég byrja daginn á að svara pósti frá Eflingar-félaga. Þessi manneskja vildi deila með mér stöðunni sem að hún ásamt fjölskyldu sinni er í á gróðavæddum húsnæðismarkaði valdastéttarinnar, þar sem að verkafólk er neytt til að borga fúlgur fjár í hverjum mánuði til þriðja aðila, bara til þess að tryggja sér þak yfir höfuðið,“ skrifar Sólveig Anna.
Hún segir að fjölskyldan hafi safnað fyrir húsnæði en að aðstæður á markaði geri það ómögulegt að eignast eigið heimili. „Vegna þess að seðlabankastjóri virðist hatast við fólk úr stétt vinnuaflsins og íslenskt stjórnmálafólk virðist aðeins vera í vinnu hjá sjálfu sér við að dunda sér við sjálfu-tökur og smá greinarskrif, er ekki möguleiki fyrir fjölskylduna að eignast eigið húsnæði. Því heldur húsnæðis-arðránið áfram, og þau eru látin strita til að gera þá ríku enn ríkari,“ segir hún.
Sólveig Anna bætir við að hún fái fjölda sambærilegra skilaboða frá bæði innlendu og aðfluttu verkafólki. „Fólkinu sem með vinnu sinni skapar verðmæti þjóðarbúsins og heldur jafnframt umönnunarkerfum samfélagsins gangandi, en þarf að þola algjört og ískalt skeytingarleysi stjórnmálafólks, sem lofar öllu fögru í aðdraganda kosninga en hefur svo aldrei dug til að standa við nokkurn skapaðan hlut,“ skrifar hún.
Hún lýsir stjórnmálunum sem „framapoti fólks sem þráir vegtyllur og elskar að vera með góð laun, eða tækifæri til að stjórna opinberum fjármálum með hagsmuni auðvaldsins í fyrirrúmi.“
Í lok færslunnar leggur hún áherslu á að breytingar muni aðeins verða með skipulagðri baráttu verkafólks. „Ég lifi í þeirri von að Eflingar-fólk nái að skipuleggja baráttuna framundan með þeim hætti að efnahagsleg og pólitísk valdastétt sjái sig tilneydda að verða við kröfum okkar um réttlæti til handa stéttar vinnuaflsins. Á þessum tímapunkti hef ég nákvæmlega enga trú á því að meðlimar valdastéttarinnar séu færir um að gera annað en að strjúka eigin egóum.“
