Wilhelm Wessman, frumkvöðull á sviði íslensks hótel- og veitingareksturs, lést á Landspítalanum mánudaginn 3. ágúst.

Morgunblaðið greinir frá andláti hans.

Wilhelm fæddist á Höfn í Hornafirði 2. október 1942, sonur hjónanna Elofs Wessman klæðskerameistara og Dagnýjar Wessman húsmóður.

Wilhelm starfaði á Hótel Sögu frá 1967 og gegndi þar fjölbreyttum stjórnunarstörfum í mörg ár. Árið 1989 tók hann við sem hótelstjóri Holiday Inn í Reykjavík og gegndi starfinu til 1994.

Síðar starfaði Wilhelm sem ráðgjafi og svæðisstjóri hjá InterContinental Hotels Group og bar meðal annars ábyrgð á gæðastjórnun og innleiðingu rekstrarstaðla í Evrópu og Afríku.

Eftirlifandi eiginkona Wilhelms er Ólöf Wessman. Börn þeirra eru Linda, Róbert og Gunnhildur.