Tónlistarmaðurinn Svavar Knútur fer mikinn á opinberri síðu sinni þar sem hann lýsir yfir þungum áhyggjum og mikilli velgju yfir svokölluðu „AI slop“ gervigreindarefni sem herjar nú á samfélagsmiðla. Tilefnið er Instagram-rás þar sem gervigreindarpersóna „syngur“ svokallað „víkingapopp“ á íslensku og skartar yfir 200 þúsund fylgjendum.
Svavar lýsir tónlistinni sem „ógeðslega lélegri, vondri íslensku“ og segir melódíuna „fáránlega slappa meðalmennsku“ þar sem röddin sé með „hásan, klénan, ofur-autotunaðan glansrispu tón.“
Gagnrýnir skort á stafrænu læsi
Það sem virðist hafa fyllt mælinn hjá tónlistarmanninum var þegar samstarfsfélagi hans sýndi honum skilaboð frá tengdamóður sinni, sem hafði sent rásina áfram og dásamað efnið með orðunum: „Vá hvað þetta er magnað flott!“
Svavar veltir því upp í kjölfarið hvort eldra fólk skorti algjörlega gagnrýna hugsun gagnvart tækninni. „Er í alvörunni fullorðin manneskja svona skyni skroppin að finnast þetta sálarlausa ógeð á einhvern hátt manni bjóðandi?“ spyr Svavar á síðu sinni.
Hann dregur einnig upp samlíkingu við stjórnmálin og segist nú skilja fylgi ákveðinna stjórnmálaflokka betur, ef markaður sé fyrir „þennan ótrúlega tilgangslausa og falsa viðbjóð.“
„Internetið er dautt“
Að mati Svavars sýnir þetta fram á að svokölluð „Dead Internet Theory“ (kenningin um dautt internet) sé að raungerast. Sú kenning kveður á um að meiri hluti efnis og umferðar á netinu sé nú framleiddur og stýrður af vélmennum (bottum) fremur en raunverulegu fólki.
„Internetið er dautt. Þetta er búið,“ segir Svavar. „Bottar gera content fyrir botta sem læka og kommenta og fylgja bottarásum og skafa streymistekjur af manneskjum í síauknum mæli. Það er enginn að hlusta á 90% af efninu þarna úti. Þetta eru bara bottar.“
Færsla tónlistarmannsins snertir á vaxandi áhyggjum innan listamannasamfélagsins um að gervigreind og sjálfvirk sýndarauðkenni séu að metta markaðinn með innihaldslausu magni á kostnað lifandi menningar og raunverulegs handverks.
Athugasemdir