Einbýlishús við Hellisgötu 24 í Hafnarfirði hefur verið sett á sölu fyrir 144,9 milljónir króna. Húsið var reist árið 1920 og býður upp á fjölbreytta nýtingarmöguleika, meðal annars möguleika á allt að sjö svefnherbergjum.

Eignin er timburhús á steyptum grunni og er skráð samtals 224,6 fermetrar. Þar af er íbúðarrýmið 182,6 fermetrar og sérstæður bílskúr 42 fermetrar. Íbúðarhúsið er á þremur hæðum.

Á fyrstu hæð eru anddyri, herbergi, snyrting, eldhús, borðstofa og setustofa. Á annarri hæð eru tvö svefnherbergi auk sjónvarpsstofu sem hægt er að breyta þannig að þar verði tvö svefnherbergi til viðbótar. Í kjallara eru tvö svefnherbergi, baðherbergi og þvottahús. Úr þvottahúsinu er gengið út í gróinn garð þar sem meðal annars er heitur pottur.

Við húsið stendur rúmgóður 42 fermetra bílskúr með rafmagni, heitu og köldu vatni, rafdrifinni bílskúrshurð og sérinngangi. Við hlið hans er skjólgóð timburverönd og fyrir framan bílskúrinn er hellulagt bílaplan.

Húsið stendur í grónu hverfi skammt frá miðbæ Hafnarfjarðar. Þá eru Hellisgerði og Víðistaðatún í nágrenninu auk leik- og grunnskóla og gönguleiða meðfram sjávarsíðunni.