Útlit er fyrir að kjarasamningum verkalýðsfélaganna verði sagt upp ef Samtök atvinnulífsins (SA) koma ekki til móts við kröfur um leiðréttingar fyrir launafólk. Halla Gunnarsdóttir, formaður VR, segir stöðuna þunga, viðræður ganga illa og tímann á þrotum.
Forsendur kjarasamninganna brustu í ágúst þegar verðbólga mældist yfir þeim viðmiðum sem sett voru. Verkalýðsfélögin, þar á meðal VR, LÍV og fagfélögin, hafa nú frest til 8. október til að ákveða hvort samningunum verði sagt upp. Þríhliða viðræður standa yfir á milli Alþýðusambands Íslands (ASÍ), SA og ríkisstjórnarinnar til að reyna að afstýra uppsögn, en að sögn Höllu vantar talsvert upp á að lausn sé í sjónmáli.
„Þar eru nú svona einhverjar hugmyndir komnar á blað en það vantar talsvert upp á að mati verkalýðshreyfingarinnar,“ segir Halla í samtali við RÚV. Hún bætir því við að sérstakar viðræður félaganna við SA gangi „ekkert sérstaklega vel“ og að engin viðbrögð hafi borist við þeim leiðréttingartillögum sem þegar hafa verið lagðar fram á þremur fundum.
Gagnrýnir fyrirtæki og sveitarfélög
Verkalýðsfélögin hafa skorað á stærstu fyrirtæki landsins og sveitarfélög að sýna samfélagslega ábyrgð og halda aftur af verð- og gjaldskrárhækkunum. Viðbrögðin hafa hins vegar valdið vonbrigðum. Halla bendir á að flest fyrirtækin segist taka stöðuna alvarlega en ætli sér þó ekki að grípa til neinna sértækra aðgerða.
Hún gefur sömuleiðis lítið fyrir nýlega yfirlýsingu Kópavogsbæjar, þar sem skorað var á opinbera aðila að takmarka hækkanir við 2,5 prósent.
„Sveitarfélög sem hafa farið í fararbroddi um að hækka leikskólagjöld um tugi prósenta og segjast svo ætla að stilla þeim í hóf núna, það er svolítið holur hljómur,“ segir Halla.
Aðeins 18 dagar eru til stefnu og segir Halla ekkert í hendi sem geti komið í veg fyrir uppsögn samninganna ef ekkert breytist á næsta fundi deiluaðila.
