Hezbollah gerði drónaárás í suðurhluta Líbanons í gær þar sem háttsettur yfirmaður í ísraelska hernum særðist alvarlega. Um er að ræða Meir Biderman, 41 árs ofursta í hinni illræmdu 401. brynvarðasveit ísraelska hersins.
Sveitin hefur verið nefnd sem sú hersveit sem beri ábyrgð á drápi hinnar sex ára palestínsku stúlku Hind Rajab í Gaza City árið 2024.
Tveir aðrir hermenn særðust einnig í árásinni og voru allir fluttir á sjúkrahús í Haifa til meðferðar. Samkvæmt ísraelskum miðlum hlaut Biderman alvarlega höfuðáverka en hefur nú komist til meðvitundar og er sagður í stöðugu ástandi.
Biderman tók við stjórn sveitarinnar eftir að forveri hans féll í sprengjuárás í Jabalia í norðurhluta Gaza í upphafi stríðsins í október 2023.
Tengd drápi Hind Rajab
401 brynvarðasveitin hefur verið sögð bera ábyrgð á drápi Hind Rajab, sex ættingja hennar og tveggja sjúkraflutningamanna sem reyndu að bjarga henni í Gaza-borg í janúar 2024.
Samkvæmt Dyab Abou Jahjah, stofnanda The Hind Rajab Foundation, er sama hersveit einnig sögð hafa tekið þátt í innrásinni á al-Shifa-sjúkrahúsið og að hafa „ógnað“ íbúum í Rafah.
Hind Rajab Foundation hefur safnað saman gögnum gegn herdeildinni sem kölluð er „Vampire Empire Company“ innan 52. brynvarðafylkisins. Gögnin voru lögð fram í 120 blaðsíðna skýrslu hjá Alþjóðlega sakamáladómstólnum í Haag.
Í skýrslunni eru meðal annars nefndir Beni Aharon, yfirmaður 401. brynvarðasveitarinnar, Daniel Ella, yfirmaður 52. brynvarðafylkisins, og Sean Glass, yfirmaður „Vampire Empire Company“.
Samtökin sögðust ekki geta staðfest hvort Biderman væri meðal þeirra nafna sem lögð voru fram í trúnaði fyrir Alþjóðaglæpadómstólnum, en staðfestu að hann hefði starfað innan sömu herdeildar.
Drónar Hezbollah valda Ísrael áhyggjum
Árásin kemur á sama tíma og drónar Hezbollah eru sagðir verða sífellt meira vandamál fyrir ísraelska herinn í suðurhluta Líbanons.
Samkvæmt ísraelska ríkisútvarpinu KAN hafa sprengjudrónar Hezbollah takmarkað um 80 prósent aðgerða ísraelska hersins á svæðinu. Herinn hafi því dregið úr ferðum að degi til við landamærin og framkvæmi nú flestar aðgerðir í skjóli nætur.
Hér fyrir neðan má sjá stiklu úr túnísku kvikmyndinni The Voice of Hind Rajab, sem fjallar um morðið á Hind litlu en myndin var meðal annars tilnefnd til Óskarsverðlaunanna sem besta erlenda kvikmyndin.
