Undrandi á að spilakassar hafi verið opnaðir 4. maí: „Krumlunum hafði verið meinaður aðgangur að aleigu spilafíkla of lengi“

Alma Björk Blöndal Haf­steins­dóttir, ráð­gjafi og fyrr­ver­andi spilafík­ill, er undr­andi á að spila­kassar Íslands­spila sf. voru opn­aðir þann 4. maí. Hún skrifar færslu um málið á Facebook undir yfir­skrift­inni „Sama hvað – þá skal opna!“.

Alma Haf­steins­dóttir.

Í færslu sinni lýsir Alma ástand­inu sem hefur ríkt und­an­farið í sam­fé­lag­inu og um heim allan vegna kór­ónu­veiru­far­ald­urs­ins. Hún segir að þann 4. maí hafi bjart­ari tímar blasað við mörgum þegar tak­mörk­unum sam­komu­banns var aflétt að hluta.

„Flestir gleymdu sér í gleð­inni, en á sama tíma voru góð­gerða­sam­tök undir nafni sam­eign­ar­fé­lags­ins Íslands­spila að láta útbúa fyrir sig spritt­brúsa með merki og nafni Íslands­spila og prenta út leið­bein­ingar þar sem spilafíklar eru beðnir um þrífa hend­urnar og spila­kass­ana með spritti áður en spilun í spila­kassa hefst,“ skrifar Alma.

Hún segir fólk almennt hafa virst nokkuð sátt með lokum spila­kassa þegar fréttir af áhrifum lokanna bár­ust.

„Almenn­ingur virð­ist hafa verið nokkuð sáttur með lokun spila­kassa, því fréttir bár­ust af spilafíklum sem misst höfðu stjórn á spilafíkn sinni í umræddum spila­kössum og allt í einu náðu þeir að hætta að spila og verða virkir þátt­tak­endur í eigin lífi og sinna nán­ustu. Atvinnu­rek­endur fundu fyrir jákvæðum afleið­ingum lok­unar spila­kassa og fjöl­skyldur spilafíkla voru í skýj­unum,“ skrifar Alma.

Í færslu sinni tekur Alma fram að hún geri sér grein fyrir að kór­ónu­veiru­far­ald­ur­inn hefði aldrei útrýmt spilafíkn alveg en hún bendir á að þessi tími hafi varpað ljósi á jákvæðar afleið­ingar þess að loka spila­kössum á Íslandi.

Hún segir það valda sér von­brigðum að sjá að sam­tök sem reka spila­kassa hér á landi hafi ekki nýtt þetta tæki­færi til að rann­saka afleið­ingar spila­kassa­starf­sem­innar.

„…en á þessum tímum gafst þeim tæki­færi til að staldra við með opunun spila­kassa og mögu­lega opna spila­kassa í breyttri mynd t.d. með fjár­hæða­tak­mörk­unum eða heft­ara aðgengi fyrir alla ekki síst börnin okkar. Þeim gafst tæki­færi til að standa að rekstri spila­kassa með ábyrg­ari og sið­legri hætti en verið hefur í tæp 30ár.“

Þess má geta að Rauði kross­inn er stærsti eig­andi Íslands­spila sf. með 64 pró­senta eign­ar­hlut. Slysa­varna­fé­lagið Lands­björg á 26,5 pró­sent og SÁÁ 9,5 pró­sent.

„En Íslands­spil fyrir hönd eig­enda sinna telja opnun spila­kassa bráð­nauð­syn­lega og jafn­vel nauð­syn­legri en að almenn­ingur kom­ist í sund, lík­ams­rækt, nú eða geti knúsað ömmu og afa. Kruml­unum hafði verið mein­aður aðgangur að aleigu spilafíkla of lengi – það skyldi byrja um leið og minnsta smuga gæf­ist –sama hvað!“

Alma segir ljóst að þau sam­tök sem reka Íslands­spil sf. hafi ætlað að fá sín „frjálsu fram­lög“, burt séð frá heil­brigð­is­sjón­ar­miðum.

„Þessi góð­gerða­sam­tök ÆTLA að fá sín „frjálsu fram­lög“ , sama hvað allri heil­brigðri skyn­semi og heil­brigð­is­sjón­ar­miðum líður – því jú spilafíklar geta bara sprittað sig sjálfir og spila­kassa Íslands­spila sf.!“

Færslu Ölmu má sjá í heild sinni hér fyrir neðan

Sjá einnig: Spilaði fyrir 20 millj­ónir á tveimur árum