Víða erlendis hefur sálfræðimeðferð á netinu notið vaxandi vinsælda síðustu ár en það meðferðarúrræði hentar mörgum því bæði sparar það tíma og dregur úr ferðalögum á milli staða, svo eitthvað sé nefnt.
Nú stendur Íslendingum slík þjónusta til boða því nýsköpunarfyrirtækið Mín líðan býður til að mynda upp á hugræna atferlismeðferð (HAM) á netinu. Árið 2018 hlaut fyrirtækið verðlaun fyrir vefkerfi ársins á Íslensku vefverðlaununum sem veitt eru af Samtökum vefiðnaðarins. Auk þess hefur það fengið ýmsa styrki á síðastliðnum fjórum árum.
Kjósi fólk að nýta sér fjarviðtöl þá fara þau fram, samkvæmt vefsíðu fyrirtækisins, í formi myndfunda þar sem skjólstæðingur og sálfræðingur eiga samtöl gegnum netið. Boðið er upp á ókeypis kynningartíma fyrir þá sem vilja kynna sér þennan möguleika og nánari upplýsingar er að finna á vefsíðu fyrirtækisins.
Á dögunum undirritaði bæjarstjóri Garðabæjar samning við stofuna Mín líðan um aukna sálfræðiþjónustu fyrir börn á elsta stigi grunnskóla sem eiga við kvíða að etja. Um tilraunaverkefni er að ræða og eru fyrstu viðtölin í boði fyrir nemendur Sjálandsskóla í lok þessa skólaárs, samkvæmt frétt á vefsíðu Garðabæjar.
Viðtölin halda áfram í haust og hefjast þá einnig í öðrum skólum Garðabæjar. Stendur verkefnið til áramóta en þá verður gerð úttekt á verkefninu og það endurmetið.
Athugasemdir