Listahópurinn BrimRót hefur flækst inn í deilur fyrrverandi hjóna sem bæði vildu fá inni í vinnuaðstöðu hópsins í menningarhúsinu Gimli á Stokkseyri. Formaður hópsins segir það skýrt að lögmaðurinn Páll Ásgeir Davíðsson hafi komið í húsið talsvert á undan Bergljótu Arnalds rithöfundi og að hann hafi ekki beitt sér fyrir því að hún missti vinnuaðstöðu sína líkt og Bergljót hefur haldið fram. Hópurinn vísaði Bergljótu frá vegna ágangs hennar.
„Ég var kominn á undan í húsið og það staðfesta óháðir aðilar.“
Í samtali við Mannlíf í síðasta tölublaði lét Bergljót í það skína að hún hafi fengið úthlutað vinnuaðstöðunni og að barnfaðir hennar hafi síðar komið inn. Hún segist hafa flutt til Eyrarbakka til að fá frið en hjónin fyrrverandi hafa lengi staðið í illdeilum. Páll Ásgeir ítrekar að hann hafi verið á undan inn í menningarhúsið. Hann bendir á að dómstólar hafi fjallað um þeirra deilumál. Niðurstaðan hafi verið alveg skýr, dómurinn hafi komist að þeirri niðurstöðu að engin gögn lægju fyrir um ætlaða ofbeldishneigð hans og að ekki væri talin ástæða til að ætla að hann myndi beita ofbeldi.
Alveg skýrt
Páll Ásgeir ásakanir Bergljótar á hendur sér óboðlegar um að hann hafi komið sér inn í vinnuaðstöðu listamannanna á Stokkeyri sökum þess að hún væri þar með aðstöðu fyrir eða með það fyrir augum að koma henni þar frá. Hann segir alveg skýrt að hann hafi verið kominn inn á undan henni.
Í svari til Mannlífs segist Bergljót hins vegar hafa óskað eftir því að fá umrædda vinnuaðstöðu í ágúst á síðasta ári en fyrrum eiginmaðurinn hafi komið inn í janúar síðastliðnum. Þrátt fyrir umleitanir þess efnis við hópinn að barnsföðurnum yrði vísað frá í ljósi eldri deilumála þeirra var niðurstaða hópsins að vísa rithöfundinum frá húsinu.
Staðfest niðurstaða
Páll Ásgeir er ósáttur með að vera málaður þeirri mynd að vilja klekkja á fyrrverandi eiginkonu sinni með því að troða sér inn í vinnuaðstöðuna á Stokkseyri, hvað þá að það ætti að vera í þeim tilgangi að bola henni í burtu. „Ég var kominn á undan í húsið og það staðfesta óháðir aðilar. Ég bakkaði um leið og það urðu leiðindi vegna Bergljótar. Ég var þarna eingöngu til að bíða eftir dóttur minni meðan hún kláraði skólann langt frá heimili mínu og hafði enga ástæðu til að ætla að Bergljót væri á menningarsetrinu,“ segir Páll Ásgeir.
Athugasemdir