„Ég er þó ekki í félagi aldraðra feðra“

Guðni Th. Jóhann­es­son, for­seti Íslands, og eig­in­kona hans, Eliza Reid, búa við mikið barna­lán. Þau eiga saman fjögur börn. Þau eru fædd með tveggja ára milli­bili, árin 2007, 2009, 2011 og 2013. Hann á eina dóttur frá fyrra hjóna­bandi. Hún er fædd árið 1994. Mikill ald­urs­munur er því á yngsta og elsta barni Guðna, eða 19 ár. Guðni segir að börnin tryggi ham­ingj­una. Það að yngri börnin eru fædd með tveggja ára milli­bili var ekki skipu­lagt.

„Við vissum að við vildum búa saman og eiga börn. Ég er þó ekki í félagi aldr­aðra feðra,“ segir hann og vísar til þess að hann var kom­inn á miðjan aldur þegar yngstu börnin fædd­ust.

Guðni tók fjall­göngu með rit­stjóra Mannlífs og segir frá æsku­ár­unum, fjöl­skyld­unni og föð­ur­miss­inum, for­seta­fram­boð­inu og emb­ætt­inu, mik­il­vægi lýð­heilsu og mörgu fleira.

Ekkert glæsilíf

Margir sjá emb­ætti for­seta Íslands í hyll­ingum og telja líf for­set­ans og fjöl­skyldu hans ein­kenn­ast af glæsi­leika og í flestu frá­brugðið því sem almenn­ingur lifir. Guðni segir að lífið á Bessa­stöðum sé í raun ósköp venju­legt fjöl­skyldu­líf barna­fjöl­skyldu. Þá njóti hann þess að geta óáreittur farið allra sinna ferða og blandað geði við fólk.

„Ég reyni að flétta saman starf mitt og fjöl­skyldu­líf eftir bestu getu. Það hefur oft­ast tek­ist bless­un­ar­lega vel en auð­vitað verður stundum eitt­hvað undan að láta. Börnin vita að ég hef skyldur og sýna því skiln­ing. Ég get nefnt sem dæmi að í gær­kvöld kom ég fram í sjón­varps­þætti en náði svo að bruna á fót­bolta­leik með einum syni mínum í Garðabæ. Ég náði síð­asta korter­inu. Svona kring­um­stæður gátu nú líka komið upp í mínu fyrra starfi en við Íslend­ingar búum við það lán að sá eða sú sem gegnir emb­ætti þjóð­höfð­ingja getur um frjálst höfuð strokið.“

Jafn­rétti ríkir á milli hjón­anna á Bessa­stöðum þegar kemur að heim­il­is­verkum og barna­stússi. Guðni seg­ist aðspurður kunna á þvotta­vél heim­il­is­ins og önnur þau tæki sem til staðar séu.

„Áður en ég fór á Bessa­staði skiptum við verk­unum sam­visku­sam­lega. Í dag höfum við starfs­fólk sem léttir undir með okkur eins og þörf krefur. Við höfum þó með­vitað reynt að láta þessa breyt­ingu á mínum starfs­högum ekki hafa of mikil áhrif á okkar dag­lega líf og höldum börnum okkar utan við sviðs­ljós fjöl­miðl­anna.“ segir Guðni, í við­tali við Mannlíf.

Ólafur Darri Ólafsson Mynd / Hallur Karlsson

Í helg­ar­blaði Mannlífs er einnig við­tal við Ólaf Darra Ólafsson leik­ara, sem við­ur­kennir að hann sé for­dekraður, feitur og frægur mið­aldra karl sem geti grátið yfir BYKO-aug­lýs­ingum. Hann seg­ist þola illa frekju og hroka og vill halda í sak­leysið í sjálfum sér. Í við­tali við Mannlíf ræðir hann sveifl­urnar á leik­ara­ferl­inum, meðal ann­ars prufu fyrir stór­mynd­ina Hobbit­ann þar sem hann seg­ist hafa gert upp á bak

Herra Hnetu­smjör. Mynd / Hallur Karlsson

Séð og Heyrt skoðar flúr fræga fólks­ins.

Í Mannlíf má einnig finna góm­sætar upp­skriftir úr eld­húsi Gest­gjafans, lífstíls­efni frá Vikunni, heim­ili og hönnun frá Hús og hýbýli, við­töl við tón­list­ar­menn í Albumm, tísku, skoð­anapistil og margt margt fleira.

Gríptu Mannlíf með þér á föstu­dag og eigðu nota­lega helgi.