Berglind 11 ára kveður Ágúst föður sinn í dag: „Takk fyrir allt sem þú hefur gert fyrir mig“

Ágúst H. Guð­munds­son, sjó­maður, körfu­bolta­þjálf­ari og athafna­maður, verður bor­inn til grafar í dag en hann lést fyrir aldur fram á nýárs­dag. Útför hans fer fram frá Akur­eyr­ar­kirkju eftir hádegi. Hann var ein­ungis 53 ára og lætur eftir eig­in­konu og þrjú ung börn, það yngsta 11 ára. Hún kveður föður sinn í minn­ing­ar­grein þrátt fyrir ungan aldur.

Ágúst kall­aði sig ávallt Pat­reks­firð­ing þó hann hafi flutt til Hafn­ar­fjarðar ungur, enda var hann með sitt­hvorn fót­inn í báðum bæjum. Á Pat­reks­firði stund­aði hann sjó­mennsku öll sumur meðan körfu­bolta­fer­ill hans hófst hjá Haukum í Hafn­ar­firði.

Hann flutti svo aftur til Akur­eyrar þar sem hann lék með Þór með góðum árangri. Síðar þjálf­aði hann meist­ara­flokk Þórs um tíma og yngri flokka félags­ins. Hann var vin­sæll í því starfi enda sig­ur­sæll. Hann ásamt eig­in­konu sinni stofn­aði lík­ams­rækt­ar­stöð­ina Átak á Akureyri 2003 og ráku allt til árs­loka 2017. Meðfram því hélt hann  áfram sjó­mennsku, var kokkur á Harðbak, þangað til hann stofn­aði ásamt fleirum fyr­ir­tækið Neptune í því skyni að gera út rann­sókn­ar­skip og þjón­usta olíu­iðn­að­inn. Árið 2017 greind­ist hann með MND-sjúk­dóm­inn skelfi­lega.

Sjá einnig: Fetaði veg jákvæðn­innar til að takast á við áfallið

Rósa Guð­munds­dóttir, lista­kona og systir Ágústar, bölvar þeim sjúk­dómi sem felldi ungan bróður hennar. Hún mun geyma bróður sinn í hjarta sér að eilífu og hefði gefið allt til að bróður hennar hefði fengið lækn­ingu.

Í við­tali við Mannlíf árið 2018 sagð­ist Ágúst hafa valið að fara leið jákvæðn­innar þegar grein­ingin lá fyrir. „Ég held að ég hafi und­an­farið ár hlegið meira en nokkru sinni, langt yfir lands­með­al­tali og nýt þannig dags­ins. Maður hefur val um að vera jákvæður eða ekki,“ sagði Ágúst þá.

Tilefni við­tals­ins var að um 300 manns ætl­uðu að hlaupa í nafni Ágústs í Reykja­vík­ur­mara­þon­inu. Þessi rúm­lega 300 manna hlaupa­hópur safn­aði yfir fimm millj­ónum króna fyrir mál­stað­inn. Ágúst var þakk­látur:

„Það er ólýs­an­legt að vita af þessum stuðn­ingi. Vonandi er ein­hver teng­ing á milli þessa fjölda fólks við fram­komu mína við það í gegnum árin. Ég tel að við öll eigum að leggja inn eins mikið af náunga­kær­leik og frekast er kostur á okkar lífs­leið því að við fáum það svo marg­falt til baka þegar eitt­hvað bjátar á.“

Það er því ekki furða að margir minn­ast Ágústs í Morg­un­blað­inu í dag. Sú stysta er þó jafn­framt sú sorg­leg­asta en hún er eftir Berg­lindi Evu litlu sem kveður föður sinn ein­ungis ell­efu ára gömul:

„Elsku besti pabbi. Ég man svo vel eftir því þegar við fórum saman í Monkey park á Tenerife og við sáum gór­illu og þú reyndir að æsa þig og lyftir höndum og horfðir lengi í augun á henni og þá stökk gór­illan á glerið og varð ösku­reið og við fórum í hlát­ur­skast á meðan en fólk­inu sem var þar fannst þetta ekki jafn fyndið. Við hlógum lengi að þessu. Takk fyrir allt sem þú hefur gert fyrir mig. Ég elska þig. Þín Berglind Eva.