„Ég hef aldrei á ævinni séð eins mikla eymd í miðborg Reykjavíkur“

„Ég hef aldrei á ævinni séð eins mikla eymd í mið­borg Reykja­víkur og þessi dægrin. Samt hefur ástandið verið betra hér en víð­ast hvar ann­ars staðar. Maður getur þess vegna ekki annað en velt fyrir sér hvaða lang­tíma­á­hrif lok­un­ar­að­gerð­irnar um víða ver­öld muni hafa. Hvaða áhrif mun það hafa á heila kyn­slóð að missa af árunum þar sem hún átti að taka fyrstu skrefin á vinnu­mark­aði? Hvaða áhrif mun það hafa á fólk að mega ekki hitta annað fólk á þeim tíma sem oft er kall­aður bestu ár ævinnar þar sem það kynn­ist vinum sínum fyrir lífs­tíð?“

Þetta segir Halldór Armand Ásgeirs­son, rit­höf­undur og útvarps­maður, í pistli sem fluttur var í Víðsjá og birt­ist á vef RÚV í morgun. Halldór hefur veru­legar áhyggjur af því að harðar sótt­varnir vegna COVID hafi haft skelfi­leg áhrif á líf almenn­ings, ekki síst þeirra yngri. Hann gagn­rýnir í pistl­inum almanna­varnir á for­sendum heim­speki.

„Hvaða áhrif mun þetta gígantíska atvinnu­leysi hafa til fram­tíðar? Hvaða áhrif mun sú ævin­týra­lega fjár­málakreppa sem nú er byrjuð hafa á and­lega heilsu og kjör fólks? Hver verða áhrif mestu pen­inga­prent­unar mann­kyns­sög­unnar sem seðla­bankar víða um heim halda nú gang­andi til að borga fyrir fíaskóið? Hvaða áhrif mun það hafa til lengri tíma að aðgerðir vegna covid-19 hafa bitnað lang­sam­lega verst á þeim sem voru verst staddir fyrir en á sama tíma verið mjög arð­bærar fyrir hina ríku, til dæmis í formi síhækk­andi hluta­bréfa­mark­aða og fast­eigna­verðs? Hvaða áhrif mun það hafa til lengri tíma að búið sé að setja slíkt for­dæmi í frjálsum lýð­ræð­is­þjóð­fé­lögum að svipta almenn­ing mann­rétt­indum í svo stórum stíl í nafni lýð­heilsu?,“ spyr Halldór.

Hann seg­ist ekki geta svara þessu sjálfur. „Ég þyk­ist ekki vita svörin. En mér finn­ast þetta vera til­tölu­lega aug­ljósar spurn­ingar sem þarf að horfast í augu við hvort sem maður er sam­mála því að við séum öll almanna­varnir eða ekki. Fórn­ar­lömb veirunnar eru og verða miklu fleiri en bara þau sem fá hana. Auðvitað er gott að rík­is­stjórnin spurði lækni en ekki Íslands­meist­ar­ann í keilu um það hvernig ætti að bregð­ast við heims­far­aldri. En það er ekki hægt að meta bara áhrif veirunnar á sam­fé­lagið og fram­tíð þess með því að liggja ein­ungis yfir tölum um smit á hverjum morgni og láta eins og ekk­ert annað skipti eða geti skipt máli. Mannlegt sam­fé­lag er miklu flókn­ara og marg­brotn­ara en svo og mann­leg til­vist snýst um annað en það eitt að útrýma gjör­sam­lega áhættu.“