Hugi nokkur segir frá furðulegri reynslu sinni af lögmanni í höfuðborginni sem hafði tekið mál sitt að sér. Þegar viðkomandi hafði engu sinnt málinu í um tvo mánuði kallaði Hugi eftir gögnum sínum en þá vildi ekki betur til en svo að hann fékk afhenda trúnaðarmöppu sem tilheyrðu öðru máli en hans.
Hugi virðist varla vita hvað hann eigi að gera í málinu og leitaði því ráða inni í fjölmennum hópi áhugafólks um lögfræði, Lögfræðinördar, á Facebook. Þar segir hann:
„Lögfræðingur skilaði mér skjölum sem hann hafði ekkert unnið með. Til þess þurfti ég að senda daglega skilaboð í rúmlega 2 mánuði til að fá þau til baka. En með mínum skjölum kom mappa með trúnaðarskjölum úr öðru máli og það vantaði möppu í mitt mál með ýmsum nauðsynlegum skjölum í staðinn. Og lögfræðingnum virðist standa á sama um að ég sé með pappíra úr öðru máli og hann veit af þeim skjölum,“ segir Hugi og bætir við:
„Hann hefur ekkert gert til þess að skila mínum týndu skjölum eða að endurheimta skjöl úr hinu málinu sem hann afhenti með mínum skjölum. Maður spyr bara hvort að það sé ekki álitið sem alvarleg mistök lögfræðings að afhenda ókunnugum aðila trúnaðarskjöl annara skjólstæðinga sinna? Hvað á maður að gera þegar sinnuleysið er að drepa menn og þeir skila ekki öllum gögnum til baka og maður situr uppi með annara mála skýrslur?“
Sigfús virðist hafa lent í svipuðu. „Það var lögfræðistofa sem fór á hausinn og var með mitt mál og öll gögnin mín tíndust,“ segir Sigfús.
Alexandra nokkur segir málið alveg skýrt. „Ef lögfræðingur léti einhvern fá trúnaðargögn um mig myndi ég vilja vita af því. Ég myndi klárlega láta þá aðila vita sem málið varðar og koma gögnunum til þeirra ásamt því að tilkynna þetta. Þar sem að þetta eru trúnaðargögn er mjög mikilvægt að þú farir með þau sem slík og látir engan sjá þau eða fá afrit af þeim nema þá sem eiga þau,“ segir Alexandra.
Védísi finnst engin spurning um að málið þurfi að tilkynna. „Ég myndi alltaf byrja á að tilkynna viðkomandi til Persónuverndar og Siðanefndar lögmanna. Það leysir þó ekki vandann með gagnaskilin,„ segir Védís.
Og Marínó G. Njálsson er sömu skoðunar. „Sé um persónugreinanlegar upplýsingar, þá ber að tilkynna þetta til Persónuverndar. Bara svo það sé á hreinu,“ segir Marínó ákveðinn.
Athugasemdir