Mál Arons Einars og Eggerts Gunnþórs komið inn á borð ákærusviðs

Mál knatt­spyrnu­mann­anna Arons Einars Gunn­ars­sonar og Eggerts Gunnþórs Jóns­sonar er nú komið inn á borð ákæru­sviðs. Lögregla hefur því form­lega lokið rann­sókn á mál­inu.

Ævar Pálmi Pálmason, yfir­maður kyn­ferð­is­brota­deildar, stað­festi þetta við frétta­stofu RÚV í gær. Um er að ræða rann­sókn lög­reglu á kyn­ferð­is­brota­máli sem kom upp í Kaup­manna­höfn fyrir rúmum ára­tug en þeir Aron Einar og Eggert Gunnþór hafa rétt­ar­stöðu grun­aðra í mál­inu.

Meintur brota­þoli birti frá­sögn sína á sam­fé­lags­miðlum í maí síð­ast­liðnum. Sögur voru á reiki um það hvaða tveir knatt­spyrnu­menn ættu í hlut en í lok sept­em­ber var greint frá því að lög­regla hefði tekið mál tví­menn­ing­anna upp að nýju að beiðni brota­þola.

Þegar Aron Einar var ekki val­inn í lands­liðs­hóp­inn gaf hann frá sér yfir­lýs­ingu þar sem hann sagði meðal ann­ars að það hlyti að vera vegna sögu­sagna um meint brot í Kaup­manna­höfn. Hann þvertók fyrir það að hafa gerst brot­legur gagn­vart neinum og að hann ætl­aði sjálfur að óska eftir því að gefa skýrslu hjá lög­reglu.

„Það er hrika­legt áfall að vera ásak­aður um hræði­legt of­beld­is­brot vegna at­viks sem var svo sann­ar­lega ekki með þeim hætti sem lýst er í fjöl­miðlum,“ sagði Eggert Gunnþór í yfir­lýs­ingu sem hann sendi frá sér eftir að hafa verið nafn­greindur í Stund­inni.

Þeir Aron Einar og Eggert Gunnþór hafa gefið það út að þeir reikni með því að málið verði fellt niður. Þetta sögðu þeir strax í des­em­ber, eftir að hafa gefið skýrslu hjá lög­reglu. Rannsókn var því enn í fullum gangi á þeim tíma.

„Þeir hafna því með öllu að hafa brotið af sér og reikna með að málið verði fellt niður. Afstaða þeirra er því alveg óbreytt. Að öðru leyti vís­ast til fyrri yfir­lýs­inga þeirra en þeir munu ekki tjá sig frekar um málið að sinni,“ sagði í yfir­lýs­ingu frá lög­manni þeirra við það tæki­færi.

Í ljós hefur komið að KSÍ leyndi mál­inu og virð­ist það hafa verið upp­hafið að falli Guðna Bergs­sonar, fyrrum for­manns KSÍ, sam­kvæmt skýrslu úttekt­ar­nefndar á vegum Íþrótta­sam­bands Íslands um KSÍ. Hvorki Aron Einar né Eggert Gunnþór voru nafn­greindir í skýrsl­unni en þar sagði að Guðni hefði í júní vitað að Aron Einar væri annar tveggja manna sem sak­aðir væru um kyn­ferð­is­brot í metoo-frá­sögn á sam­fé­lags­miðlum.