Foreldrar í Reykjanesbæ eru uggandi yfir nýjustu ráðningu Stapaskóla en Mannlíf sagði frá því í dag að Leifur Garðarsson hafi verið ráðinn í skólann. Mun hann að öllu óbreyttu hefja störf þann 1. ágúst næstkomandi en hann var ráðinn af skólastjóra Stapaskóla, Gróu Axelsdóttur, sem deildarstjóri unglingadeildar.
Óhætt er að segja að ráðningin hefur valdið titringi meðal foreldra barna í skólanum enda þurfti Leifur að segja af sér skólastjórastöðu í Áslandsskóla vegna ósæmilegra samskipta við kvenkyns leikmanns en hann starfaði einnig sem körfuknattleiksdómari.
Sjá einnig: Leifur Garðars ráðinn sem deildarstjóri unglingadeildar Stapaskóla: „Fólk var varla að trúa þessu“
Mannlíf ræddi við móður barns í Stapaskóla en hún vill ekki láta nafn síns getið. Aðspurð að því hvernig henni litist á ráðningu Leifs hafði hún eftirfarandi að segja:
„Mér finnst ótrúlegt að maður með þetta orðspor fái að starfa aftur innan veggja grunnskóla. Því hann hefur látið af störfum í grunnskóla sem stjórnandi vegna óviðeigandi hegðunar. Stapaskóli er einn umdeildasti skóli Suðurnesjanna og þessi ráðning er ekki til þess fallin að fólk sé að tala vel um skóla barnanna sinna eða sé spennt fyrir því að setja börnin sín í skóla þarna, sérstaklega á unglingastigi. Það ætti bara að hlusta á háværar raddir foreldra barna í skólanum og draga ráðninguna til baka. Það var örugglega fullt af öðrum frábærum og frambærilegum einstaklingum sem sóttu um þessa stöðu.“
Athugasemdir