Athafna- og fjárfestingarkonan Kristín Pétursdóttir hefur nú ákveðið að setja glæsilegt einbýlishús sitt á sölu.
Hér er um að ræða eitt glæsilegasta einbýlishús Hafnarfjarðar, staðsett á Hringbraut 59.
Húsið er 308,3 fermetrar að stærð; þar af er bílskúrinn 36,5 fermetrar.
Í kringum húsið er stór, falleg og gróin 1649,7 fermetra eignarlóð sem liggur að Jófríðarstaðalandi.
Einstakur útsýnisstaður, þar sem fallegt er að sjá yfir Hafnarfjörð, vestur yfir höfnina, til sjávar, fjalla og víðar.
Húsið var byggt 1959 og teiknað af Guðmundi Kr. Kristinssyni arkitekt. Kristín tók húsið algjörlega í gegn á sínum tíma; einstaklega glæsilegt hús í alla staði.
Húsið var endurhannað að innan af Hönnu Stínu innanhússarkitekt; má þar nefna sérsmíðaðar innréttingar í öllum rýmum, gegnheilt náttúrulegt planka parket frá Dinesen á gólfum. Glæsilegur arinn, vandaðar flísar og veggfóður, marmari í eldhúsi og inn á baðherbergi. Vönduð innfelld blöndunartæki.
Garðurinn er viðhaldslítill þar sem náttúrinni er leyft að njóta sín. Hraun og fallegur trjágróður umlykja húsið og lynggras er á flötum og á þaki bílskúrs.
Óskað er eftir tilboði í húsið, sem er líklega eitt það dýrasta á Íslandi.
Þess má geta að Matthías Á Mathiesen fyrrum ráðherra bjó í húsinu um áratugaskeið og er húsið stundum nefnt Mathiesen-húsið hjá gamalgrónum Hafnfirðingum.
Athugasemdir