Sonur Ólafs fær að gista hjá frænku sinni í nokkra daga: „Ætli ég verði ekki fyrir utan í bílnum“

Hinn átt­ræði Ólafur Snævar Ögmunds­son og hreyfi­haml­aður sonur hans, Auðunn Snævar Ólafsson, sem Alma leigu­fé­lag henti út á göt­una á dög­unum, hafa gist á hót­eli síð­ustu daga. Ólafur segir þá bjart­sýna, þrátt fyrir stöð­una.

Sjá einnig: Alma leigu­fé­lag lét bera átt­ræðan mann og hreyfi­haml­aðan son hans úr íbúð þeirra – Sjáðu mynd­böndin

Mannlíf heyrði í Ólafi sem sagði að þeir feðgar hefðu verið á hót­eli síð­ustu daga og borgað 50.000 krónur fyrir nótt­ina. „Þannig að við getum ekki verið fleiri nætur sko. Við verðum að fara eitt­hvað annað á morgun,“ sagði hann og bætti við að sonur hans geti fengið að vera hjá systur Ólafs í nokkra daga. „Ætli ég verði ekki fyrir utan hjá henni í bílnum. Það er ekki um annað að ræða.“

Ólafur segir enga hjálp að fá frá hinu opin­bera. „Nei, það er alveg dauður geiri. Nema kannski ef ég væri frá Króatíu eða ein­hvers staðar utan úr heimi, þá fengi ég kannski hjálp. Því miður er þetta svona.“

Aðspurður hvort það væri enga von að finna svar­aði Ólafur: „Ég var nú að sækja um hjá Brynju en það tekur nú sinn tíma. En það er ekk­ert í deigl­unni nema þetta.“ Varðandi málið í heild segir Ólafur að þetta hefði komið honum mjög á óvart. „Ég verð bara að segja eins og er að ég átti ekki von á þessu, þetta var eins og eld­ing úr lausu lofti. Ég hafði borgað í marga mán­uði, alltaf skil­vís­lega en það var eitt­hvað gam­alt sem ég glopraði niður fyrst eftir Covid-veik­indin, þegar ég kom frá Spáni. Ég lá inni á spít­ala á meðan það var verið að laga mig til.“

Mannlíf spurði Ólaf út í heils­una í dag. „Hún er bara hjá karli sem er að verða átt­ræður. það fer eftir veðri og vindi sko, eftir því hvort hann sé hægra meg­inn eða vinstra megin.“ Varðandi and­lega heilsu svar­aði Ólafur: „Við feðgarnir erum það lánsamir að vera bjart­sýnir menn og frá léttu fólki komnir. Þannig að við erum ekk­ert að leggj­ast í neina eymd. Alma kemst ekki með okkur þangað.“