Lögregla var kölluð til í gærkvöld vegna óvenjulegrar líkamsárásar þar sem hamri var beitt gegn meintu fórnarlambi. Ekki kemur fram í Dagbók lögreglu hvort játning liggi fyrir eða hve alvarleg árásin var. Málið er til rannsóknar.
Vanstilltur maður var með ógnandi hegðun á almannafæri. Þegar lögreglumenn komu á vettvang hafði hann uppi hótanir gegn þeim og lýsti yfir vilja og getu til að berja þá. Hann var yfirbugaður og hvílist nú í fangaklefa á lögreglustöð.
Að öðru leyti voru verkefni lögreglunnar hefðbundin. Manni í annarlegu ástandi vísað út af veitingastað. Annar var handtekinn og læstur inni vegna ölvunar. Þá var réttindalaus ökumaður staðinn að akstri. Annar ökumaður, reyndist einnig vera réttindalaus og í þokkabót ölvaður. Hann mun sæta ábyrgð. Ökumaður var stöðvaður á 143 kílómetra hraða þar sem hámarkið er 80 kílómetrar á klukkustund. Hann missir réttindi til aksturs.
Grunsamlegir menn voru á ferð í íbúðahverfi á svæði Kópavogslögreglu. Ekki tókst að finna hina meintu bófa þrátt fyrir eftirgrennslan. Í Hafnarfirði bar það helst til tíðinda að vespu var stolið.
Athugasemdir