Í Facebook hópi Sósíalistaflokks Íslands í gær tilkynnti Gunnar Smári Egilsson, ritstjóri Samstöðvarinnar og formaður framkvæmdastjórnar flokksins, að hömlur yrðu settar á tjáningu fólks í hópnum. Sagði hann að fólk gæti aðeins búið til einn nýjan þráð á sólarhring og þá þurftu að líða meira en 60 mínútur milli þess að fólk ritaði nýja athugasemd við færslu.
Sagði ritstjórinn að framkvæmdastjórn flokksins hafi tekið þessa ákvörðun og hún ætti við um alla í hópnum.
„Það var samþykkt á fundi framkvæmdastjórnar fyrir nokkrum vikum að hægja á því fólki sem hefur að mörgu leyti lagt undir sig þennan vettvang, sett hér inn marga statusa á dag og kommentað á mínútu fresti. Admin mun því setja þær skorður á fólk að það geti aðeins sett inn einn status á dag og eitt koment á hverri klukkustund. Þetta er regla sem gildir um alla. Fyrst er fólk settar þessar skorður í viku, en síðan lengur ef þurfa þykir. Þessar reglur eru settar til að kæla aðeins niður hitann sem hér kviknar á þráðum. Hugmyndin hefur alltaf verið að sú, að þetta sé vettvangur fyrir umræðu um pólitík og samfélag. Þá fer ekki vel að fólk sé hrópandi og æst. Það er fráhrindandi fyrir þau sem vilja taka þátt.“
Það virðist þó ekki hafa gengið eftir en aðeins liðu sjö klukkustundir þar til Gunnar Smári hafði stofnað nýjan þráð í hópnum. Í þeim þræði gagnrýndi Gunnar Smári fréttaflutning RÚV af þeim hömlum sem settar höfðu verið á spjallhópinn. Þar á undan hafði hann brotið reglurnar með því að skrifa athugasemdir með minna en klukkutíma fresti.
Gunnar er einn af ritstjórum spjallhópsins og þá vekur athygli að nafni hópsins hefur verið breytt úr Rauði þráðurinn – Sósíalistaflokkur Íslands í Rauði þráðurinn.
Tekið skal fram að fleiri en Gunnar hafa brotið nýjar reglur hópsins.
Framkvæmdastjórn flokksins skipa: Gunnar Smári Egilsson, Hallfríður Þórarinsdóttir, Kári Jónsson, Laufey Líndal Ólafsdóttir, Luciano Dutra, Margrét Pétursdóttir, Oddný Eir Ævarsdóttir, Sara Stef. Hildardóttir og Sæþór Benjamin Randalsson.
Athugasemdir