Sólveig Anna Jónsdóttir, formaður Eflingar, hefur sagt sig úr Sósíalistaflokki Íslands eftir harða orðræðu um boðskap hennar gegn woke-hugmyndafræði. Sólveig birtir stöðufærslu frá Maríu Pétursdóttur, sem var áður oddviti flokksins í Suðvesturkjördæmi, sem gagnrýnir hana fyrir að „tala beint inn í öfgahægrið og fasismann“.
Þetta segir Sólveig Anna jafngilda því að henni sé líkt við fasista. Hún segir sig því úr flokknum og undirstrikar nýjan klofning hjá vinstri flokknum.
„Við að lesa svívirðingarnar, þar sem að ein af forystukonum flokksins líkir mér við fasista og segir mig tala gegn mannréttindum er mér ljóst að ég á ekki lengur heima í Sósíalistaflokknum,“ segir Sólveig í kveðjufærslu á Rauða þræðinum, spjallsvæði Sósíalistaflokksins. „Það þykir mér leitt en við því er ekkert að gera. Nema að hætta í flokknum sem ég geri hér með. Ég get ekki tilheyrt hópi þar sem að stemmningin er orðin svona yfirgengilega biluð.“
Gagnrýndi woke-herferð
Ummælin sem fylltu mælinn hjá Sólveigu Önnu voru gagnrýni Maríu þess efnis að hún klyfi Sósíalista með því að fara í vegferð gegn woke-hugmyndafræði, sem hún sagði nýlega að væri „ömurlegt“. Hún talaði til Sólveigar Önnu og Viðars Þorsteinssonar, framkvæmdastjóra Eflingar. „Þið eruð ekki samherjar í vinstrinu. Þið eruð einangrunarsinnar sem talið gegn mannréttindum og inn í jaðarinn og yfir til hægri og inn í fasismann. Þið raunverulega trúið þeirri vitleysu að félagshyggja sé fyrir stéttabaráttunni.“
Nýlega setti framkvæmdastjórn Sósíalastaflokksins þær reglur að enginn mætti setja meira en ein ummæli á hverri klukkustund. Þeirri takmörkun hefur nú verið aflétt og er uppi fótur og fit.
Þór Saari, fyrrverandi þingmaður Borgarahreyfingarinnar og Hreyfingarinnar, segist „láta sem hann sjái ekki“ úrsögn Sólveigar Önnu og biður Maríu að biðjast afsökunar. „Ég tala bara til hennar á sama hátt og hún talar til annarra nema ég sagði henni ekki að hún væri geðveik eða neitt slíkt,“ svarar María.
Einn þáttakandi í umræðunni skorar á Maríu Pétursdóttur að „segja af sér“.
„Ég er ekki í neinu embætti,“ svarar hún.
Klofningur skekur efstu sæti
Sólveig Anna var í þriðja sæti framboðslista Sósíalistaflokksins í Reykjavíkurkjördæmi Suður í þingkosningunum í nóvember. María Pétursdóttir var í öðru sæti í Reykjavík norður, á eftir Gunnari Smára Egilssyni.
Sósíalistaflokkur Íslands er nú þegar klofinn vegna deilna ungliða og fleiri gagnvart formanni framkvæmdastjórnar flokksins, Gunnari Smára Egilssyni. Deilurnar hófust þegar Karl Héðinn Kristjánsson, starfsmaður Eflingar, sakaði Gunnar Smára um andlegt ofbeldi og fleira. Karl var sjálfur í öðru sæti í Reykjavík suður.
Fylgi Sósíalistaflokksins mældist 5,4% í síðustu könnun Gallups, litlu minna en Framsóknarflokksins.
Athugasemdir