„Ég hafði þann ótrúlega heiður að vera boðið í kínverska sendiráðið á Íslandi í dag og eyða tíma með sendiherranum, He Rulong,“ sagði Sæþór Benjamín Randalsson, meðlimur í Sósíalistaflokki Íslands, í færslu á Facebook í síðustu viku.
Sæþór er hluti af þeim hópi sem staðið hefur gegn núverandi formanni framkvæmdastjórnar Sósíalistaflokks Íslands, Gunnari Smára Egilssyni. Framundan er uppgjör á aðalfundi Sósíalistaflokksins á laugardag þar sem kallað er eftir formannsskiptum.
Gunnar Smári vekur máls á því í dag að meðlimurinn sem upphaflega reisti ágreininginn við hann, deilir færslu Sæþórs undir þeim formerkjum að þar fari næsti formaður. „Verðandi formaður Sósíalistaflokksins hitti sendiherra Kína (allir mæta á aðalfundinn 24. maí og kjósa),“ sagði Karl Héðinn.
„Það skrítna er að Karl Héðinn Kristjánsson, andófsmaður í Sósíalistaflokknum, dreifði þessum status inn á spjallþráð þeirra sem stefna á yfirtöku á Sósíalistaflokknum með þessum orðum,“ sagði Gunnar Smári í skilaboðum til félagsmanna í morgun.
Ræddu Sólveigu Önnu
Færslu Sæþórs var vel tekið af þeim hópi sem helst hefur gagnrýnt Gunnar Smára og hans nánasta fylgisfólk. Þar á meðal eru Sólveig Anna Jónsdóttir, formaður Eflingar, þar sem Sæþór starfar, og Trausti Breiðfjörð Magnússon.
„Ég er mjög þakklát fyrir þessa reynslu. Kína og afrek þess undir forystu flokksins hafa verið innblásandi að fylgjast með og erlendir sendiherrar þeirra, allir meðlimir flokksins, eru mjög fagmannlegir í starfi sínu. Ísland gæti lært margt af því hvernig á að beisla framleiðsluafl þjóðarinnar til að nota til að bæta hag allra borgara,“ segir Sæþór.
Hann ræddi samskipti Íslands og Kína, og svo formann Eflingar, Sólveigu Önnu Jónsdóttur.
„Mér var boðið upp á ljúffengt kínverskt te og ég fékk að tala við sendiherrann um Eflingar og formann okkar, Sólveigu Önnu, sem hann var mjög forvitinn um. Við töluðum um samskipti Íslands og Kína og ég fékk að spyrja um Kínverska utanríkismálaháskólann.“
Þá kynnti Sæþór kínverska sendiherranum hugmyndir um innviðauppbyggingu. „Ég kynnti hugmyndina um að fá hraðlest umhverfis eyjuna og þóríumofn til að knýja hana, ásamt því að hjálpa okkur að þjálfa verkfræðinga við háskólann okkar til að þjónusta hana, en ég held að ég gæti þurft aðeins meira pólitískt vald til að klára samninginn.“
Sæþór tilkynnti í dag framboð sitt í framkvæmdastjórn Sósíalistaflokksins, eins og síðustu tvö ár, og hefur lagt fram stefnuskrá sem horfir til starfsaðferða Eflingar.
„Efling hefur verið frábært dæmi um hvernig hægt er að endurvekja virka stéttabaráttu hér á Íslandi og við ættum að afrita ferlið inn í stjórnmálaflokkinn okkar,“ segir hann þar.
Unnið að formannskiptum
Karl Héðinn Kristjánsson svarar Gunnari Smára í umræðum á Rauða þræðinum, spjallsvæði Sósíalistaflokksins, með því að endurtaka ásakanir á hendur honum og kalla eftir formannsskiptum.
„Þú sviptir fólk launum, beitir andlegu ofbeldi og ferð með félögin eins og þinn einkaklúbb,“ segir Karl. „Þú hefur barist gegn valddreifingu, gegn svæðisfélögum og gegn því að félagsmenn fái reglulega upplýsingar og rödd í eigin hreyfingu. Ég vona að flokksmenn sjái í gegnum þetta leikrit og kjósi nýja forystu. Þá getum við farið í þá nauðsynlegu uppbyggingarvinnu sem þú hefur staðið í vegi fyrir.“
Sögulega séð hafa íslenskir sósíalistar reynt að rækta tengslin við Kína. Viðhorf íslenskra vinstrimanna til Kína þróaðist þó yfir í aukna gagnrýni á valdbeitingu Kommúnistaflokks Íslands. Síðustu áratugi hafa samskipti Íslands við Kína, bæði frá hægri og vinstri, almennt litast af viðskiptahagsmunum. Þannig var það ríkisstjórn Jóhönnu Sigurðardóttur sem undirritaði fríverslunarsamning við Kína, þann fyrsta sinnar tegundar við evrópska þjóð.
Athugasemdir