Öldungadeild franska þingsins samþykkti frumvarp seint í gær, sem felur í sér að samþykkisleysi sé hluti af lagalegri skilgreiningu á nauðgun, sem ryður brautina fyrir opinbera samþykkt þess á næstu mánuðum.
Atkvæðagreiðslan kemur nokkrum mánuðum eftir að dómstóll í Avignon sakfelldi franskan mann fyrir að hafa byrlað Gisèle Pélicot, eiginkonu sinni, lyf svo hann og ókunnugir menn gætu nauðgað henni.
Málið vakti á ný athygli á útbreiddri tíðni nauðgana og mikilvægi samþykkis.
Frumvarpið sem samþykkt var í vikunni endurskilgreinir öll kynferðisbrot, þar með talið nauðganir, sem „athafnir án samþykkis“.
Þjóðþingið, neðri deild franska þingsins, samþykkti fyrri útgáfu af frumvarpinu í apríl.
Atkvæðagreiðslan á miðvikudag er þó ekki síðasta hindrunin í lagaferlinum. Gert er ráð fyrir að nefnd með fulltrúum úr báðum deildum þingsins útbúi sameiginlega útgáfu af frumvarpinu áður en það verður endanlega samþykkt í hvorri deild fyrir sig.
„Samþykki felst ekki í því að segja nei,“ sagði jafnréttismálaráðherrann Aurore Berge, heldur í því „að segja já, skýrt já, af frjálsum vilja, án þrýstings eða tvíræðni“.
Atkvæðagreiðslan er „afgerandi skref í átt að raunverulegri menningu samþykkis“, bætti hún við.
Frumvarpið sem báðar deildir þingsins samþykktu skilgreinir samþykki sem „frjálst og upplýst, skýrt, fyrir fram gefið og afturkræft“ og bætir við að það „megi ekki álykta út frá þögn fórnarlambsins eða skorti á viðbrögðum einum saman“.
Núverandi lagaskilgreining á nauðgun í Frakklandi er „hvers kyns kynferðisleg innsetning... með ofbeldi, þvingun, hótun eða óvæntum hætti“, en með þessu frumvarpi yrði sérstaklega tekið fram að „ekki er samþykki til staðar við slíkar aðstæður“.
Þótt atkvæðagreiðslan á miðvikudag bendi til aukins samhljóms, hafa sumir þingmenn og aðgerðasinnar lýst yfir áhyggjum af breytingunum.
Stuðningsmenn frumvarpsins telja að með þessu verður auðveldara að draga gerendur til ábyrgðar. Andstæðingar óttast aftur á móti að breytingarnar muni leiða til þess að rannsakendur einbeiti sér óhóflega að hegðun fórnarlamba.
Löggjöf sem byggir á samþykki í nauðgunarmálum er þegar í gildi í nokkrum Evrópulöndum, þar á meðal Þýskalandi, Hollandi, Spáni og Svíþjóð.
Athugasemdir