Meira en 400 manns úr röðum frægra einstaklinga og fjölmiðlafólks, þar á meðal leikkonan Miriam Margolyes, grínistinn Alexei Sayle, leikkonan Juliet Stevenson og leikstjórinn Mike Leigh, hafa undirritað opið bréf til stjórnenda BBC þar sem þau krefjast þess að Robbie Gibb verði fjarlægður úr stjórn stofnunarinnar vegna meintra hagsmunaárekstra í tengslum við umfjöllun um málefni Miðausturlanda.
Meðal undirritaðra eru 111 starfsmenn BBC, auk listamanna og fræðimanna á borð við Zawe Ashton, Khalid Abdalla, Shola Mos-Shogbamimu og sagnfræðinginn William Dalrymple. Í bréfinu lýsa þeir áhyggjum af „ógegnsæjum ritstjórnarlegum ákvörðunum og ritskoðun“ hjá BBC í tengslum við fréttaflutning af Ísrael og Palestínu.
Bréfið var afhent daginn áður en Channel 4 sýndi heimildarmyndina Gaza: Doctors Under Attack, sem BBC hafði upphaflega látið framleiða en ákvað að sýna ekki. BBC taldi að sýning myndarinnar „gæti skapað ímynd hlutdrægni“. Í bréfinu segir að þessi ákvörðun „sýni enn og aftur að BBC starfar ekki samkvæmt eigin stefnu um að flytja fréttir „án ótta eða hylli“ þegar kemur að Ísrael“.
Þar er BBC einnig ásakað um að vera „lamað af ótta við að vera álitið gagnrýnið á ríkisstjórn Ísraels“. Sérstaklega er vísað til Robbie Gibb og stöðu hans innan stjórnar BBC og ritstjórnarnefndar. Undirritaðir lýsa áhyggjum af því að „einstaklingur með náin tengsl við Jewish Chronicle hafi áhrif á ritstjórnarlegar ákvarðanir, þar með talið ákvörðunina um að sýna ekki Gaza: Medics Under Fire“.
Gibb, sem áður var fjölmiðlafulltrúi Theresu May og yfirmaður stjórnmáladeildar BBC í Westminster, leiddi hóp sem keypti Jewish Chronicle árið 2020 og sat í stjórn fjölmiðlafyrirtækisins þar til í ágúst 2024.
Í bréfinu, sem var skipulagt af hópi starfsfólks innan BBC, segir: „Fyrir mörg okkar hafa vinnuframlög verið hunsuð vegna ógegnsærra ákvarðana teknar á æðstu stigum BBC án umræðu eða útskýringa. Slíkar brotalamir bitna á áhorfendum okkar.“
„Sem stofnun höfum við ekki veitt neina marktæka greiningu á aðkomu breskra stjórnvalda að stríðinu gegn Palestínumönnum. Okkur hefur mistekist að fjalla um vopnasölu og mögulegar lagalegar afleiðingar hennar. Þess í stað hafa samkeppnisaðilar BBC verið fyrstir með þær fréttir.“
Bréfið fullyrðir að Gibb hafi „hagsmunaárekstra“ sem „dragi fram tvöfalt siðgæði“ gagnvart starfsfólki sem hefur upplifað ritskoðun í skjóli þess að tryggja hlutleysi.
„Í sumum tilvikum hefur starfsfólk verið sakað um að hafa pólitískan hvata vegna þess að það hefur deilt fréttum gagnrýnum á ríkisstjórn Ísraels á samfélagsmiðlum. Á sama tíma situr Gibb áfram í áhrifastöðu með litlu gagnsæi um ákvarðanir sínar, þrátt fyrir að pólitískar skoðanir hans séu vel þekktar. Við getum ekki lengur beðið greiðendur afnotagjalds BBC um að líta fram hjá hugmyndafræðilegum tengslum Gibbs,“ segir í bréfinu.
Í lokin segir:
„Við, undirrituð starfsfólk BBC, verktakar og fulltrúar fjölmiðlageirans, lýsum yfir djúpri vantrú á að fréttaflutningur BBC af Ísrael og Palestínu uppfylli þær kröfur sem áhorfendur okkar gera. Við teljum stöðu Robbie Gibb, bæði í stjórn BBC og í ritstjórnarnefnd, ósjálfbæra. Við krefjumst þess að BBC standi sig betur og staðfesti skuldbindingu sína við hlutleysi, heiðarleika og að flytja fréttir án ótta eða hylli.“
Af ótta við afleiðingar undirrituðu 111 blaðamenn BBC bréfið nafnlaust.
Talsmaður BBC svaraði á þann veg:
„Öflugar ritstjórnarumræður innan teyma okkar eru nauðsynlegur hluti vinnuferlisins. Við höfum stöðugar umræður um fréttaflutning og hlustum á ábendingar frá starfsfólki, en teljum best að slíkar samræður fari fram innan stofnunarinnar.
Varðandi umfjöllun okkar um Gaza, þá er BBC algerlega skuldbundið hlutlausri umfjöllun og hefur flutt áhrifaríka fréttaskýringu frá svæðinu. Auk fréttaflutnings, greininga og rannsókna höfum við framleitt verðlaunamyndir á borð við Life and Death in Gaza og Gaza 101.“
Athugasemdir