Hávarður Máni Hjörleifsson var jarðsunginn í gær, föstudaginn 19. september en hann hefði orðið 21 árs í október. Í kjölfar fráfalls hans birti Lára Zulima Ómarsdóttir, samúðarkveðju til fjölskyldu Hávarðs og áminningu til samfélagsins á Facebook, þar sem hún kallar eftir alvöru úrræðum fyrir ungt fólk í vanda. Lára, sem er fjölmiðlakona og leiðtogi almannatengla hjá Pipar/TBWA, gaf Mannlífi góðfúslegt leyfi til að fjalla um færsluna.
„Ég sendi fjölskyldu hans mínar innilegustu samúðarkveðjur,“ segir í færslunni.
Lára spyr jafnframt hvenær stjórnvöld ætli að bregðast við:
„Hvenær ætlar samfélagið og stjórnvöld að gera eitthvað til að aðstoða ungt fólk í vanda og koma upp alvöru úrræðum fyrir þau sem glíma við veikindi? Fyrirheitin eru alltaf fögur en efndirnar litlar.“
Hún lýsir reynslu aðstandenda sem margsinnis hafi reynt „að fá aðstoð fyrir ástvini okkar en komum að lokuðum dyrum.“
„Hvenær verða sett á alvöru geðheilsuúrræði fyrir fólk þar sem tekið er á móti ungu fólki, já bara öllu fólki, af virðingu, þar sem þeim mætir alúð og skilningur?“ spyr Lára enn fremur.
Í færslunni rifjar hún upp að hafa fyrst kynnst úrræðaleysi í geðheilbrigðismálum þegar náinn vinur hennar missti dóttur sína fyrir tæpum 20 árum. „Margoft hefur verið fjallað um vandann í fréttum en lítið þokast. Nú er komið nóg,“ segir Lára.
Hún leggur áherslu á að hlustað sé á fólk í vanda og að úrræðin séu mannúðleg:
„Það þarf að hlusta á þau sem þurfa aðstoðina og vinna með þeim. Það þarf að koma fram við þau af virðingu og með kærleika að leiðarljósi. Yfirboð og framkoma sem einkennist af fordómum og fyrirlitningu skilar okkur engu og hefur engu skilað.“
Færslunni lýkur á samúðarkveðju til fjölskyldunnar: „Elsku fjölskylda; ég sendi ykkur mínar dýpstu samúðarkveðjur frá mínum innstu hjartarótum. Guð geymi Hávarð Mána.“
Athugasemdir