Söngkona All Saints opinberar dekkri hlið poppheimsins á tíunda áratugnum

Melanie Blatt, söng­kona hljóm­sveit­ar­innar All Saints, hefur sagt opin­skátt frá því hvernig tón­list­ar­stjórar tóku því þegar hún varð ófrísk á ferli sínum með sveit­inni. Melanie, sem er 50 ára í dag, opnar sig í nýrri heim­ild­ar­mynd og lýsir raun­veru­leika frægð­ar­innar á níunda ára­tugnum.

Hún kemur fram í heim­ild­ar­mynd­inni Girl­Bands Forever, þar sem hún segir frá því þegar hún og Nicole Appleton, með­limur All Saints, sögðu stjórn­endum frá þungun sinni. Melanie heldur því fram að þeim hafi verið sagt að eyða fóstr­unum og ein­beita sér að vel­gengni sveit­ar­innar.

„Ég hafði ekki verið lengi með kærast­anum mínum og þetta kom okkur klár­lega á óvart,“ segir Melanie í þætt­inum. „Það var engin gleði eða ham­ingja yfir þessu, frekar var litið á þetta með skelf­ingu og áhyggjum, með­vitað um að nú myndi allt breyt­ast.“

Í mynd­broti sem The Sun birti segir Melanie að þeim hafi verið sagt að þær væru „að eyði­leggja allt“ og að þetta væri „endir sveit­ar­innar“.

Melanie eign­að­ist sitt barn með þáver­andi kærasta sínum, Stuart Zender, sem var bassa­leik­ari hljóm­sveit­ar­innar Jamiroquai. Nicole, sem var ólétt eftir þáver­andi kærasta sinn Robbie Williams, átti ekki barnið.

Melanie við­ur­kennir að óléttan hafi sett mikið álag á sam­band hennar og Nicole, þrátt fyrir að þær hefðu verið bestu vin­konur frá ell­efu ára aldri. Þær tóku jafn­vel óléttu­próf saman og ræddu um að ala upp börn hlið við hlið.

„Það er í raun ekki mitt að tala um það,“ segir Melanie, „en því miður… þetta var mjög óþægi­leg staða vegna þess að ég ákvað að halda mínu barni og hún ekki.“ Hún segir þetta hafa verið „mjög erfitt tíma­bil“ í þeirra vin­áttu.

All Saints, sem skipuð var Melanie, systr­unum Nicole og Natalie Appleton og Shaznay Lewis, hætti árið 2001 eftir tvær plötur. Þegar sveitin leyst­ist upp voru sam­skiptin orðin svo stirð að Melanie segir þær hafa „hatað hver aðra“.

Heim­ild­ar­myndin, sem er sýnd á BBC Two, fjallar einnig um aðrar þekktar stúlkna­sveitir á borð við Atomic Kitten, Eternal, Suga­babes, Mis-teeq og Little Mix. Þar segir söng­konan Kéllé Bryan úr Eternal frá því hvernig útlits­kröfur voru óraun­hæfar.

„Fólk hafði alltaf áhyggjur af því hvað við værum þungar,“ segir hún og lýsir tísku­stefnu þar sem stærð núll var við­mið. „Við vorum sendar út í sveit þar sem var fylgst með því hvað við borð­uðum, í dag finnst mér þetta fárán­legt, en svona var þetta gert.“

Kéllé var aðeins 15 ára þegar hún skrif­aði undir sinn fyrsta plötu­samn­ing ásamt Louise Redknapp. Fljót­lega voru þær paraðar saman í Eternal með systr­unum Easther og Vernie Bennett.

Girl­Bands Forever er fram­leidd af Louis Theroux og fylgir í kjöl­far vel­gengni Boybands Forever. Auk við­tala við með­limi stúlkna­sveita koma meðal ann­ars Clara Amfo, Lucie Cave, MNEK, Pete Tong, Nicki Chapman, Scott Mills og Tulisa fram í mynd­inni.