Íslenski Facebook-hópurinn Fávitar í umferðinni er einn af þeim vinsælustu á landinu en tæplega 19 þúsund manns eru skráðir í hópinn.
Þar birtir fólk reglulega myndbönd og myndir af öðrum ökumönnum og dæma hegðun þeirra og fyllist athugasemdakerfið í framhaldinu af svipuðum athugasemdum. Í dag ákvað hins vegar ökumaður að birta myndband af eigin akstri til þess að biðjast afsökunar en viðkomandi var á leiðinni frá Keflavík til Reykjavíkur í morgun.
„Í morgun 8. feb. á bilinu milli kl. 8:00 og 8:30, lenti ég í hættulegu atviki í umferðinni þar sem ég óafvitandi fór yfir á hinn vegarhelminginn og var hársbreidd frá því að keyra á annan bíl,“ skrifar ökumaðurinn sem kemur ekki fram undir nafni. Um var að ræða hvíta Teslu Y, frekar nýlega að mér sýndist, með bílnúmer AVU-16,“ skrifar ökumaður og greinir frá því að þetta hafi verið leigubíll og að hann hafi verið frá Hreyfli eða A-stöðinni.
„Við vorum á leiðinni frá Keflavík (eða því svæði) og í átt að bænum þegar atvikið átti sér stað. Ég geri mér fulla grein fyrir alvarleika þess sem gerðist eða hefði geta gerst og skil vel að viðkomandi ökumaður hafi brugðist illa við. Þessi færsla er ekki sett fram til að réttlæta neitt (ég viðurkenni að ég sé fávitinn í umferðinni hérna), heldur einungis til að biðjast afsökunar ef viðkomandi ökumaður er hér inni,“ skrifar bílstjórinn og lætur myndband fylgja með en tekur fram að það sýni í raun lítið
„Teslan væntanlega með miiiikið betri og fleiri myndavélar en ég og ætla ég að gæta mun meiri varúðar í framtíðinni,“ heldur bílstjórinn áfram.
„Að lokum vil ég koma því á framfæri að ég er þakklát fyrir að ökumaðurinn hafi hægt á sér, ekið við hliðina á mér og bent mér á að hugsa. Takk fyrir það - skal passa að svipuð atvik eigi sér ekki stað aftur,“ skrifar hann svo að lokum.
Athugasemdir