Jón Gnarr, þingmaður Viðreisnar, veltir fyrir sér framtíðarskipulagi Viðeyjar og hvort þar megi byggja upp fjölskylduvænt samfélag með skýra tengingu við sögu og náttúru eyjarinnar. Þetta kemur fram í Facebook-færslu sem hann birti nýverið.
Jón segir skipulagsmál vera meðal flóknustu viðfangsefna samfélagsins, þar sem saman fari búseta, samgöngur, menningarlegar áherslur, fagurfræði, andleg líðan og lýðheilsa. Hann bendir á að skipulagsmál séu bæði fagleg fræði og pólitískt sáttamál og vísar til eigin reynslu af vinnu við Aðalskipulag Reykjavíkur 2014.
Þingmaðurinn segir að nokkur atriði í skipulagsmálum borgarinnar hafi hann ekki sett sig nægilega vel inn í á sínum tíma, en greinir frá því að hann sé nú að vinna grein um þau mál sem birtist síðar á Eyjunni. Í millitíðinni vilji hann varpa fram hugmyndum sérstaklega varðandi Viðey.
Í færslunni rekur Jón langa og merka byggðasögu Viðeyjar sem nær aftur til landnáms. Þar hafi verið reist klaustur árið 1225 og kirkja, líklega stafkirkja að norskri fyrirmynd, sem stóðu fram að siðaskiptum. Í eyjunni hafi í gegnum aldir verið búseta, búskapur og atvinnustarfsemi.
Hann segir sig hafa sótt innblástur til eyjabyggða við strendur borga í Noregi og í Svíþjóð, þar sem samfélög byggja gjarnan á menningarsögu eða hugmyndafræði á borð við vistbyggðir. Slík svæði einkennist oft af takmarkaðri bílaumferð, fjölskylduvænu skipulagi og nálægð við náttúru, segir Jón.
Jón bendir jafnframt á að á Íslandi megi finna sambærilegar byggðir í Flatey og Hrísey og veltir því upp hvort svipuð nálgun gæti átt við í Viðey. Hann lýsir hugmynd um „þorp í borg, þar sem litlum og stórum og litríkum gamaldags timburhúsum, með stórum lóðum væri dritað nokkuð óskipulega niður.“ Jón spyr svo: „Gæti það ekki orðið svolítið skemmtileg viðbót við borgina?“
Að lokum nefnir hann þá hugmynd að jafnvel mætti endurreisa klaustrið og kirkjuna sem hluta af slíkri uppbyggingu.
„Það mætti jafnvel endurreisa klaustrið og kirkjuna?“
Athugasemdir