Umferð tafðist yfir Fjarðarheiði í morgun eftir að tveir flutningabílar rákust saman um klukkan 10:30. Þetta kemur fram í frétt Austurfréttar.
Samkvæmt upplýsingum frá lögreglu hafði annar bíllinn verið stöðvaður á leið upp heiðina Seyðisfjarðarmegin þar sem ökumaðurinn var að setja keðjur á dekkin. Á sama tíma rann annar flutningabíll, sem var á leið niður í Seyðisfjörð, hægt á kyrrstæða bílinn. Engin slys urðu á fólki.
Áreksturinn varð í Neðra-Stafi þar sem mikil hálka var á veginum. Aðgerðum á vettvangi lauk fyrir hádegi og var umferð þá komin í eðlilegt horf.
Vegagerðin varar við því að færð á fjallvegum geti versnað síðar í dag þar sem spáð er hvössum vindi og snjókomu, sérstaklega á Austfjörðum.
Veðurstofan bendir einnig á að hlýindi og úrkoma sem búist er við í kvöld geti aukið líkur á grjóthruni og krapaflóðum. Stofnunin biður fólk um að láta vita ef slíkt verður vart.
Um helgina féllu jafnframt tvö lítil snjóflóð á miðjum Fagradal.
Athugasemdir