Mikið uppnám er innan Samfylkingarinnar á Ísafirði en flokkurinn sendi frá sér lista þeirra sem munu bjóða sig fram fyrir flokkinn þar á bæ í komandi sveitarstjórnarkosningum.
Það þætti í sjálfu sér ekkert furðulegt nema hvað að flokkurinn hafði sent slíkan lista í byrjun mars og er sá listi gjörólíkur þeim sem sendur var núna.
Mesta breytingin er að Gylfi Þór Gíslason, sem var oddviti á fyrri listanum, er hvergi sjáanlegur. Í fyrsta sæti er nú Svanfríður Guðrún Bergvinsdóttir en hún hafði verið í 3. sæti á fyrri listanum.
Mannlíf hafði samband við Gylfa Þór og spurði hann af hverju hann væri ekki lengur í 1. sæti. „Það fór fram aftaka,“ sagði oddvitinn fyrrverandi. Mannlíf sendi Svanfríði einnig fyrirspurn um málið en hún hefur ekki svarað henni að svo stöddu.
Í samtali við BB.is segir Gylfi að meðframbjóðendur hans hafi dreift „óánægju um hann og störf hans,“ og í kjölfar þess hafi hann óskað eftir fundi til að ræða málin. Hafi þá komið fram að fimm einstaklingar myndu segja sig af listanum yrði Gylfi á honum. Í framhaldi af því hafi hann sagt af sér sem oddviti.
Athugasemdir