Karlmaður var leiddur fyrir dómara á Norður-Írlandi í dag, grunaður um aðild að bílsprengjuárás við lögreglustöð nærri Belfast í síðustu viku. New Irish Republican Army (New IRA) lýsti síðar yfir ábyrgð á árásinni.
Hinn ákærði er Kieran Smyth, 66 ára gamall maður frá Belfast. Hann var handtekinn á þriðjudag og ákærður síðla föstudags fyrir fimm brot, meðal annars tilraun til manndráps, vörslu sprengiefna og að hafa haft hluti í fórum sínum sem ætlaðir voru til hryðjuverka.
Smyth kom fyrir dóm með fjarfundarbúnaði við héraðsdóm í Lisburn, suður af Belfast.
Samkvæmt framburði rannsóknarlögreglumanns fyrir dómi skipulögðu árásarmennirnir sendingu kínversks skyndibita og neyddu síðan ökumann sendibílsins með byssuvaldi til að aka að lögreglustöðinni með sprengju í bifreiðinni. Talið er að sprengjan hafi verið úr gaskút eða sambærilegum búnaði og að ökumanninum hafi verið sagt að hún myndi springa innan hálftíma.
Ökumaðurinn gerði lögreglu viðvart þegar hann kom á vettvang og höfðu yfirvöld hafið rýmingu nærliggjandi húsa þegar sprengjan sprakk. Engan sakaði í árásinni.
Lögregla sagði fyrir dómi að símanúmerið sem notað var við skipulagningu árásarinnar hefði verið fyllt inneign í verslun í Belfast nokkrum klukkustundum fyrir sprenginguna. Strax í kjölfarið hafi einnig verið lögð inneign inn á netbankareikning sem tengdist Smyth. Þá hafi eftirlitsmyndavélar sýnt mann sem lögregla telur vera Smyth framkvæma báðar færslurnar.
Svokallaðir andófslýðveldissinnar á borð við New IRA berjast fyrir sameinuðu Írlandi og hafna friðarsamkomulaginu frá 1998 sem batt að mestu enda á áratugalöng átök kaþólikka og mótmælenda á Norður-Írlandi, sem jafnan eru nefnd „The Troubles“.
Athugasemdir