Japanski tölvuleikjaframleiðandinn Nintendo hefur samþykkt að greiða 35 milljónir evra, jafnvirði um 40 milljóna bandaríkjadala, til að ljúka máli í Frakklandi sem sneri að gölluðum stýripinnum á Switch-leikjatölvum fyrirtækisins.
Málið á rætur að rekja til kvörtunar sem frönsk neytendasamtök lögðu fram árið 2020. Þar var fyrirtækið sakað um svokallaða fyrirfram skipulagða úreldingu, með þeim rökum að Nintendo hefði vitað af endurteknum göllum í Joy-Con-stýringum en ekki brugðist nægilega við.
Þúsundir notenda höfðu kvartað undan svonefndu „Joy-Con drift“ vandamáli, þar sem stýripinnar færðust sjálfkrafa í ákveðna átt þrátt fyrir að notendur snertu þá ekki. Vandinn kom einkum fram í upprunalegri útgáfu Nintendo Switch sem kom á markað árið 2017.
Franska neytendaverndarstofnunin komst að þeirri niðurstöðu að Nintendo Europe hefði ekki upplýst neytendur nægilega vel um vandamálið þrátt fyrir að það hefði verið þekkt um árabil. Í niðurstöðu stofnunarinnar kom fram að fyrirtækið hefði ekki tjáð sig opinberlega um gallann fyrr en árið 2020, þótt það hefði haft vitneskju um hann fyrr.
Yfirvöld telja að upplýsingagjöf fyrirtækisins hafi verið ófullnægjandi og að margir neytendur hafi því kosið að kaupa nýjar stýringar í stað þess að leita eftir viðgerð eða endurnýjun í gegnum þjónustuver fyrirtækisins.
Nintendo tilkynnti árið 2023 að fyrirtækið myndi gera við eða skipta út gölluðum Joy-Con-stýringum án endurgjalds, jafnvel þótt ábyrgðartími þeirra væri liðinn.
Athugasemdir