Flugvél á vegum United Airlines á leið frá Shanghai í Kína til San Francisco í Bandaríkjunum neyddist til að lenda í Tókýó í Japan á miðvikudag eftir að farþegi olli alvarlegum ólátum um borð.
Samkvæmt frásögn sjónarvotts, sem birti lýsingu á atvikinu á samfélagsmiðlinum Reddit, hóf farþeginn að valda usla skömmu eftir flugtak. Konan á að hafa átt í deilum við áhöfn vélarinnar og sakað starfsfólkið um að reyna að kúga sig.
Þegar flugstjóri kom úr stjórnklefanum til að reyna að róa aðstæður er konan sögð hafa veitt honum olnbogaskot. Í kjölfarið var tekin ákvörðun um að beina vélinni til Narita-alþjóðaflugvallar af öryggisástæðum.
Lögregla beið vélarinnar við lendingu og fór um borð þar sem konan var handtekin. Áður en hún var leidd frá borði mun hún hafa gripið skjöl úr sætisvasa fyrir framan sig og kastað þeim upp í loftið á meðan hún hrópaði ókvæðisorð. Myndskeið sem birt hefur verið á samfélagsmiðlum sýnir lögreglumenn glíma við konuna áður en hún er leidd úr flugvélinni.
Í yfirlýsingu frá United Airlines kemur fram að flugi númer 858 frá Shanghai til San Francisco hafi verið beint til Narita-flugvallar vegna óláta farþega.
Þar segir jafnframt að lögregla hafi fjarlægt farþegann við komuna, að viðhaldsteymi hafi yfirfarið flugvélina og að flugið hafi í kjölfarið haldið áfram ferð sinni til San Francisco.
Athugasemdir