Lögreglan í Del Rio í Texas hefur handtekið þrjár ungar konur sem grunaðar eru um að hafa orðið 32 ára fimm barna móður að bana með hnífstunguárás um hábjartan dag á fjölfarinni götu í borginni.
Samkvæmt upplýsingum lögreglu eru systurnar Kitty Mia Diaz, 21 árs, og Amaya Cookie, 19 ára, ásamt 21 árs Kyandru Renee Faz, grunaðar um að hafa ráðist á Caroline „Caro“ Peña. Peña var flutt á sjúkrahús í Del Rio með alvarlega stungusára áður en hún var síðar flutt á sérhæft áfallasjúkrahús í San Antonio. Þar lést hún af sárum sínum.
Lögregla var fyrst kölluð á sjúkrahúsið eftir að tilkynning barst um konu sem hafði hlotið hnífstungusár. Við nánari rannsókn var lögreglu vísað á vettvang árásarinnar þar sem öryggismyndavélar voru skoðaðar og vitni yfirheyrð. Í kjölfarið voru konurnar þrjár nafngreindar sem grunaðir gerendur.
Þær voru handteknar á fimmtudag og færðar í varðhald þar sem þær hafa verið ákærðar fyrir morð samkvæmt bandarískum fjölmiðlum.
Myndskeið sem birt hefur verið af handtökunum sýnir systurnar tvær brosa þegar þær eru leiddar í handjárnum af lögreglu. Einnig sjást þær brosa á fangamyndum sem teknar voru eftir handtökuna.
Lögreglan hefur ekki greint frá því hvað hafi legið að baki árásinni og rannsókn málsins stendur enn yfir.
Athugasemdir