Lítið einbýlishús við Tungustíg á Eskifirði er nú boðið til sölu þar sem óskað er eftir tilboðum í eignina. Þegar húsið var auglýst til sölu árið 2021 var ásett verð 9,5 milljónir króna.
Um er að ræða tveggja herbergja einbýlishús sem byggt var árið 1930. Húsið stendur á 200 fermetra eignarlóð miðsvæðis á Eskifirði með góðu aðgengi. Samkvæmt upplýsingum í sölulýsingu eru möguleikar á að stækka húsið eða reisa bílskúr á lóðinni.
Húsið er á þremur hæðum. Eldri hluti þess er bárujárnsklætt timburhús á steyptum kjallara en við aðalhæðina hefur verið reist steinsteypt viðbygging. Í kjallara er geymslurými, á fyrstu hæð eru forstofa, eldhús, stofa og baðherbergi og í risi eru svefnherbergi og stigapallur með tveimur geymslum undir súð.
Þótt húsið sé lítið segir í sölulýsingu að það leyni á sér. Kjallarinn er um átta fermetrar, fyrsta hæðin um 28 fermetrar og gólfflötur í risi um 19 fermetrar. Skráðir fermetrar eru þó færri þar sem kjallarinn er ekki talinn með og risið er skráð 5,7 fermetrar.
Á síðustu árum hefur verið ráðist í nokkrar endurbætur. Nýtt parket hefur verið lagt á stærstan hluta fyrstu hæðar, nýir gluggar eru komnir í allt húsið auk nýrrar útihurðar. Í eldhúsinu er L-laga innrétting og fylgja bæði uppþvottavél og ísskápur með eigninni.
Athugasemdir