Verkfræðingurinn Guðný Nielsen kallar eftir því að íslensk yfirvöld skýri hvernig brugðist verði við þegar einstaklingar, sem sakaðir hafa verið um stríðsglæpi, koma til landsins. Þetta kemur fram í Facebook-færslu sem hún birti.
Tilefni færslunnar er heimsókn rabbínans Shmuley Boteach og sonar hans, Mendy Boteach til Íslands. Mendy þjónaði í Ísraelsher og tók þátt í hernaðaraðgerðum á Gaza.
Guðný vísar til kvörtunar sem lögð hefur verið fyrir Alþjóðlega sakamáladómstólinn (ICC) þar sem Mendy Boteach sé sakaður um að hafa tekið þátt í að leggja undir sig heimili palestínskrar fjölskyldu á Gaza, valda þar skemmdum og breyta því í sýnagógu fyrir ísraelska hermenn.
„Slíkt telst stríðsglæpur og brot á bæði Fjórða Genfarsamningnum og Rómarsamþykkt Alþjóðaglæpadómstólsins. Meðfylgjandi myndir og myndbönd af athæfinu birti faðir hans á samfélagsmiðlinum X,“ skrifar hún.
Guðný segist gera ráð fyrir að embætti ríkislögreglustjóra hafi þegar haft samband við Alþjóðlega sakamáladómstólinn til að fá skýringar á því hvaða lagalegu skyldur hvíli á íslenskum yfirvöldum í málum sem þessum.
Hún beinir einnig spurningum til dómsmálaráðherra, Þorbjargar Sigríðar Gunnlaugsdóttur.
„Ég geri jafnframt ráð fyrir að Þorbjörg Sigríður Gunnlaugsdóttir, dómsmálaráðherra, hafi fyrir löngu tryggt að til staðar séu skýrir ferlar til að bregðast við málum sem þessum,“ skrifar Guðný og bendir á að Ísland taki árlega á móti fjölda ísraelskra ferðamanna.
Hún bendir jafnframt á að þar sem herskylda sé almenn í Ísrael sé líklegt að margir ísraelskir ferðamenn yfir 18 ára aldri hafi tekið þátt í hernaðaraðgerðum á Gaza.
Færslunni lýkur á gagnrýninni spurningu til ráðherra:
„Eða finnst ráðherra kannski ekkert athugavert við að íslenskar barnafjölskyldur gisti t.a.m. í kojum í skálum á Laugaveginum við hliðina á mönnum sem sakaðir eru um stríðsglæpi?“
Athugasemdir