Skákstórmeistarinn Vignir Vatnar Stefánsson segist gríðarlega þakklátur fyrir lífið eftir að hafa glímt við alvarlega vanlíðan og farið svo djúpt að hann hugleiddi að taka eigið líf. Hann vill nú nýta reynslu sína til að opna umræðuna um andlega líðan ungra karlmanna og veita öðrum í sambærilegri stöðu von.
Vignir er nýjasti gestur Sölva Tryggvasonar í hlaðvarpi hans. Hann hefur á undanförnum árum skipað sér í hóp öflugustu ungu skákmanna Íslands og vakið athygli fyrir árangur sinn við skákborðið.
Í viðtalinu ræðir Vignir meðal annars opinskátt um erfið tímabil í lífi sínu. Hann telur mikilvægt að samfélagið taki stöðu ungra karlmanna alvarlega og segir marga þeirra glíma við einangrun, fíkn og slæma andlega líðan.
„Það er erfitt að vera ungur karlmaður í vestrænum heimi í dag og þess vegna finnst mér að mér beri ákveðin skylda til þess að tala um þetta og gefa ungum karlmönnum sem eru að glíma við erfiðleika von og sýna að það sé hægt að komast út úr þessu,“ segir Vignir.
Hann nefnir meðal annars tölvuleikjafíkn og klám sem dæmi um þætti sem geti ýtt undir fíkn og einangrunarhegðun. Sjálfur vilji hann sýna með sögu sinni að hægt sé að snúa við blaðinu.
„En það er alltaf leið út og ég er besta dæmið um það. Ég held að mér beri skylda að hjálpa með því að segja mína sögu og vera alveg opinskár.“
Mikið hark að lifa á skákinni
Vignir ræðir einnig atvinnumennskuna í skák og segir það hafa verið mikið hark að reyna að framfleyta sér eingöngu með keppni. Verðlaunafé geti sveiflast verulega eftir árangri og stundum geti ein skák skipt sköpum fjárhagslega.
Hann tekur sem dæmi mót í London þar sem sigur hefði skilað honum um 1,8 milljónum króna. Vignir var með vænlega stöðu gegn spænskum stórmeistara í úrslitum en skákin endaði með jafntefli.
„Það þýddi að ég fékk þrjúhundruð þúsund kall í staðinn. Þannig að það eru ekki alltaf jólin í þessu,“ segir hann.
Að hans sögn er því mikilvægt fyrir atvinnuskákmenn að byggja upp eigin ímynd, nýta samfélagsmiðla og afla samstarfsaðila í stað þess að reiða sig eingöngu á verðlaunafé.
Staða Vignis hefur batnað samhliða auknum árangri og athygli. Hann segir fjárhagslega óvissuna ekki lengur jafn mikla og áður.
„Ég er ekki lengur í þeirri stöðu að ef ég vinn ekki mót, þá geti ég ekki borgað leiguna mína. Þannig að ég er mjög þakklátur og ætla að halda áfram að elta drauminn alla leið.“
Athugasemdir