Angela Louise Derbyshire og Darren Christopher Rollisson hafa verið dæmd í sex ára fangelsi hvort um sig í Héraðsdómi Reykjaness fyrir stórfellt fíkniefnalagabrot. Þau voru sakfelld fyrir að hafa í félagi flutt tæplega 32 kíló af amfetamíni til Íslands frá Manchester í apríl síðastliðnum.
Fíkniefnin voru falin í tveimur ferðatöskum sem þau höfðu meðferðis þegar þau komu til Keflavíkurflugvallar 12. apríl. Angela var með tösku sem innihélt rúm 14,7 kíló en í tösku Darrens voru tæp 17 kíló. Styrkleiki efnanna mældist á bilinu 35 til 50 prósent.
Við rannsókn málsins fundust umfangsmikil WhatsApp-samskipti í síma Darrens við mann sem gekk undir nafninu „Stuart Little“ en það er sama nafn og þekkt kvikmyndapersóna og er persónan mús. Stuart Little kom þannig með beinum hætti að undirbúningi ferðarinnar.
Darren viðurkenndi fyrir dómi þátttöku sína og sagði Stuart Little hafa boðið honum að flytja það sem hann taldi vera kannabis til Íslands. Hann sagði Angelu hafa samþykkt að taka þátt gegn greiðslu. Angela neitaði hins vegar sök og hélt því fram að hún hefði talið ferðina vera frí og að samskipti þeirra um greiðslur hefðu tengst viðhaldsvinnu.
Dómurinn féllst ekki á þá skýringu og taldi sannað að Stuart Little hefði skipulagt og greitt Íslandsferð þeirra. Jafnframt var talið hafið yfir skynsamlegan vafa að bæði hefðu haft ásetning til að flytja fíkniefni til landsins og unnið saman að framkvæmd brotsins.
Við ákvörðun refsingar var meðal annars litið til þess gríðarlega magns amfetamíns sem flutt var inn og þess að efnin voru ætluð til söludreifingar. Þótt þau hefðu gegnt hlutverki burðardýra taldi dómurinn að innflutningurinn hefði ekki getað orðið að veruleika án aðkomu þeirra. Þau voru því dæmd í sex ára fangelsi hvor
Athugasemdir