Össur Skarphéðinsson, fyrrverandi utanríkisráðherra Íslands, líkir andstæðingum áframhaldandi aðildarviðræðna Íslands við Evrópusambandið við MAGA-hreyfingu Donalds Trump Bandaríkjaforseta. Þetta kemur fram í pistli sem Össur birti á Facebook.
Össur segir samsvörun milli MAGA-hreyfingarinnar og þess sem hann kallar „NEI-hreyfinguna“ á Íslandi verða sífellt meira áberandi eftir því sem líður á kosningabaráttuna.
Hann gagnrýnir jafnframt fjármögnun baráttunnar gegn áframhaldandi viðræðum og heldur því fram að auðmenn og útgerðarmenn leggi henni til verulega fjármuni. Þá beinir hann spjótum sínum að Morgunblaðinu og sakar blaðið um að hafa tekið virkan þátt í málflutningi gegn Evrópusambandinu.
Össur segir jafnframt að forystumenn andstæðinga viðræðnanna reyni að skapa ótta innan embættiskerfisins og draga úr trúverðugleika sérfræðinga, háskólasamfélagsins og ráðuneyta með ásökunum um tengsl við erlend öfl.
Sérstaklega gagnrýnir Össur ummæli um að áframhaldandi viðræður við Evrópusambandið kunni að hafa áhrif á samskipti Íslands við Bandaríkin. Vísar hann þar meðal annars til ummæla Ingibjargar Davíðsdóttur, þingmanns Miðflokksins, og Ólafs Ragnars Grímssonar, fyrrverandi forseta Íslands.
Össur segir það þversagnakennt að þeir sem segist vilja verja Ísland gegn erlendum áhrifum hafi áhyggjur af viðbrögðum stjórnvalda í Washington.
„Eigum við að hafna samstarfi við vini í Evrópu en bukka okkur fyrir valdinu í Washington?“ spyr Össur í pistlinum.
Hann rifjar að lokum upp harðar deilur Íslands og Bandaríkjanna á árum áður og segir afstöðu Ólafs Ragnars nú ólíka þeirri sem fyrrverandi forsetinn hafi sýnt í samskiptum ríkjanna á sínum tíma.
Andstæðingar ósammála utanríkisráðherranum
Hannes Hólmsteinn Gissurarson, prófessor emeritus og sjálfstæðismaður, Tómas Þór Þórðarson og Þórir Sæmundsson, fyrrverandi leikari, gagnrýna harðlega ummælin Össurar í athugasemdakerfinu.
Hannes Hólmsteinn svaraði Össuri í athugasemd við færsluna og sagði að þegar rætt væri um fjármagn þyrfti einnig að taka tillit til þeirra fjármuna sem RÚV og utanríkisráðuneytið verðu til málaflokksins. Hann sakaði báðar stofnanir um að reka áróður fyrir já-hliðina.
„Og þegar þú talar um milljónamæringa, gleymdu ekki Jóni Ásgeiri og Helga Magnússyni já-megin,“ skrifaði Hannes. Hann sagðist þó ekki telja tekjur fólks skipta máli heldur þau rök sem það hefði fram að færa.
Tómas Þór Þórðarson, sem einnig er Sjálfstæðismaður, tók í sama streng og benti á fjársterka einstaklinga sem hann sagði styðja já-hliðina.
„Helstu stuðningsmenn Sjásjá eru Lárus Welding og Jón Ásgeir. Talandi um auðmenn,“ skrifaði Tómas.
Þórir Sæmundsson, fyrrverandi leikari, var enn harðorðari í garð Össurar og sagði málflutninginn einkennast af „yfirgengilegum yfirlýsingum og þvælu“.
Hann gagnrýndi jafnframt málflutning margra stuðningsmanna áframhaldandi viðræðna og sagði að í umræðunni væri ítrekað farið í manninn fremur en málefnið. Þá sakaði hann hluta já-hreyfingarinnar um yfirlæti og að tala niður til þeirra sem væru ósammála.
„Mímímímímímímímí allir eru heimskir og vondir nema ég!“ skrifaði Þórir í lok athugasemdar sinnar.
Athugasemdir