Fjölmiðlamaðurinn Tucker Carlson segir Donald Trump Bandaríkjaforseta hafa gert lítið úr afleiðingum stríðs við Íran á einkafundi þeirra í Hvíta húsinu, aðeins nokkrum dögum áður en Bandaríkin og Ísrael hófu árásir á Íran. Að sögn Carlsons á Trump að hafa sagt: „Við deyjum öll hvort sem er, þannig að það skiptir engu máli.“
Carlson greindi frá samtalinu í viðtali í Newsmakers-hlaðvarpinu NPR sem birt var í gær. Hann segist hafa rætt við Trump að minnsta kosti tíu sinnum í febrúar, þar á meðal ítarlega um hættuna á því að stríð við Íran gæti raskað olíu- og gasflæði í Mið-Austurlöndum.
Á fundinum, sem fór fram á skrifstofu forsetans, segist Carlson hafa sagt Trump að stríðið snerist ekki fyrst og fremst um kjarnorkuáætlun Írans. Trump hefði sjálfur sagt í júní árið áður að kjarnorkugeta Írans hefði verið eyðilögð, að sögn Carlsons.
Carlson sagði Trump að Ísrael væri að þrýsta á um stríð með það að markmiði að ná yfirráðum á svæðinu, veikja sex ríki við Persaflóa og ýta bandarískum herstöðvum út úr Mið-Austurlöndum.
„Ég sagði þetta við Trump, beint framan í hann, á forsetaskrifstofunni nokkrum dögum áður en stríðið hófst. Og hann horfði á mig og sagði: „Já, þú hefur rétt fyrir þér. En þegar öllu er á botninn hvolft deyjum við öll hvort sem er, þannig að það skiptir engu máli,““ sagði Carlson.
Carlson sagðist hafa orðið sleginn yfir svari forsetans.
„Ég sagði við hann: En hvað með börnin okkar og barnabörnin okkar og landið okkar? Og hann sagði: „Ugh“,“ sagði Carlson og baðaði frá sér höndunum.
„Ég var sleginn yfir þessu vegna þess að þetta er níhilismi og það er það síðasta sem nokkur leiðtogi ætti að sýna. Það skiptir máli. Það skiptir máli hver lifir eða deyr,“ bætti hann við.
Carlson gagnrýnir Trump harðlega
Carlson var áður einn af áberandi stuðningsmönnum Trumps og talaði fyrir hans hönd á landsfundi Repúblikanaflokksins árið 2024. Hann hefur hins vegar snúist gegn forsetanum, meðal annars vegna stríðsins og segist nú telja að Trump eigi að víkja úr embætti.
Carlson hefur gagnrýnt stríðið allt frá upphafi og í apríl virtist hann jafnvel gefa í skyn í eigin þætti að Trump gæti verið andkristur, samkvæmt CNN.
Trump brást síðar við gagnrýni Carlsons á Truth Social og kallaði hann og aðra gagnrýnendur „heimskingja“ sem vildu að Íran yrði með kjarnorkuvopn.
Þegar NPR leitaði viðbragða Hvíta hússins við frásögn Carlsons um einkafundinn var ekki brugðist sérstaklega við ummælunum „við deyjum öll hvort sem er“. Þess í stað sendi Hvíta húsið NPR fyrri færslu Trumps um Carlson.
„Kannski ætti hann að leita sér að góðum geðlækni!“ skrifaði Trump þar um fyrrverandi stuðningsmann sinn.
Athugasemdir