Umboðsmaður Alþingis hefur lokið meðferð kvörtunar manns sem taldi að ýmsar stofnanir og aðilar hefðu sýnt af sér vanrækslu og aðgerðarleysi þegar barnsmóðir hans flutti með börn þeirra frá Íslandi án samþykkis hans.
Málið lauk með bréfi umboðsmanns 10. september síðastliðinn og var birt nokkrum dögum síðar á vefsíðu hans.
Kvörtun mannsins beindist meðal annars að grunnskóla barnanna, félagsþjónustu sveitarfélags, lögreglu og lögmanni sem hafði starfað í umboði hans. Taldi maðurinn að þessir aðilar hefðu vitað af fyrirhuguðum flutningi barnsmóðurinnar en hvorki upplýst hann né gripið til annarra aðgerða.
Í niðurstöðu umboðsmanns kemur fram að óheimilt sé að fara með barn úr landi nema báðir forsjáraðilar samþykki ferðalagið. Ef foreldrar sem fara sameiginlega með forsjá barns greinir á um utanlandsferð getur sýslumaður úrskurðað um rétt foreldris til að fara með barnið úr landi. Slíkan úrskurð er síðan hægt að kæra til dómsmálaráðherra.
Þá gegnir dómsmálaráðuneytið hlutverki móttökustjórnvalds samkvæmt lögum um afhendingu brottnuminna barna. Í því felst meðal annars samstarf við stjórnvöld annarra ríkja þegar barn hefur verið flutt með ólögmætum hætti milli ríkja.
Umboðsmaður benti á að ekki yrði ráðið af kvörtun mannsins að fyrir lægi úrskurður sýslumanns eða dómsmálaráðuneytisins um heimild móðurinnar til að fara með börnin úr landi. Þá virtist maðurinn ekki hafa leitað til dómsmálaráðuneytisins vegna brottflutnings barnanna.
Hvað lögregluna varðaði hafði heldur ekki verið leitað til nefndar um eftirlit með lögreglu. Umboðsmaður taldi jafnframt að maðurinn ætti fyrst að beina athugasemdum sínum vegna grunnskólans og félagsþjónustunnar til yfirmanna viðkomandi starfsmanna og sveitarfélagsins.
Af þessum sökum taldi umboðsmaður skilyrði ekki uppfyllt til að taka kvörtunina til frekari meðferðar.
Kvörtunin beindist einnig að störfum lögmanns en umboðsmaður tók fram að starfssvið embættisins næði ekki til starfa lögmanna. Sá sem telur lögmann hafa brotið gegn lögum eða siðareglum getur hins vegar lagt fram kvörtun hjá úrskurðarnefnd lögmanna.
Umboðsmaður benti manninum að lokum á að hann gæti leitað til embættisins á ný eftir að niðurstaða viðeigandi stjórnvalda lægi fyrir, teldi hann þá enn tilefni til.
Athugasemdir