Kennari í Mæri og Raumsdals (Møre og Romsdal á norsku)- fylki í Noregi hefur verið dæmdur í eins árs og fimm mánaða fangelsi fyrir að hafa varðveitt, keypt og selt myndefni sem sýnir kynferðislegt ofbeldi gegn börnum.
Þetta kemur fram í frétt norska ríkisútvarpsins NRK.
Maðurinn var handtekinn og ákærður síðasta haust. Hann starfaði þá sem kennari við skóla í Mæri og Raumsdals-fylki.
Samkvæmt dómsniðurstöðu hafði maðurinn varðveitt mikið magn mynda og myndskeiða sem sýndu kynferðislegt ofbeldi gegn börnum í um tíu ár.
Lögreglan fann tæplega 400 myndir og myndskeið.
Maðurinn er sagður hafa notað fjölda nafnlausra netfanga, VPN-dulritunarþjónustu og samskipta- og skráageymsluþjónustur á borð við Snapchat, Dropbox, Kik, Messenger og OneDrive.
Hann notaði þessa miðla til að hlaða upp, geyma, deila, skiptast á, kaupa og selja efni sem sýndi börn í kynferðislegum aðstæðum.
Maðurinn játaði sök og var málið tekið fyrir í héraðsdómi sem játningarmál.
Í dómsniðurstöðunni er einnig lögð áhersla á að maðurinn hafi tekið skýra afstöðu gegn eigin háttsemi og leitað sér aðstoðar hjá opinberu stuðningskerfi.
Lögreglan hefur ekki haft grun um að maðurinn hafi beitt neinn í nærsamfélaginu líkamlegu eða kynferðislegu ofbeldi.
Auk fangelsisdómsins verða tölva, tveir farsímar og tugir netfanga gerð upptæk.
Athugasemdir