Lögreglan í Flórída handtók 41 árs gamlan mann, Jermel Jones, þann 23. júlí á meðan hann var við vinnu sína í Chuck E. Cheese, klæddur sem lukkudýr fyrirtækisins, músin sjálf. Hann er grunaður um að hafa stolið greiðslukorti viðskiptavinar í júní og notað það fyrir nokkur kaup sem námu alls 105,57 dollurum (um 12.000 kr) yfir mánuðinn, samkvæmt lögregluskýrslu sem E! News hefur undir höndum.

Eigandi kortsins hafði heimsótt staðinn 28. júní með dóttur sinni í afmælisveislu þegar kortið týndist. Hún tók eftir óvenjulegum færslum frá verslunum sem hún hafði ekki heimsótt, þar á meðal 1Smoke Shop, Whataburger, Circle K og Time Saver. Hún heimsótti þá eina verslunanna, skoðaði upptökur og greindi manninn tafarlaust sem starfsmann Chuck E. Cheese.

Lögreglumaðurinn Jarrett Cruz frá lögreglunni í Tallahassee var sendur á vettvang, og þegar hann kom að Jones, sem var í búningi músarinnar, nálgaðist hann með þessum orðum: „Chuck E, komdu með mér Chuck E.“ Samkvæmt skýrslunni reyndi Jones að streitast á móti með því að læsa handleggina og reyna að losa sig.

Lögreglumaðurinn yfirbugaði hann, handjárnaði og leiddi út í lögreglubíl. Jones neitaði sök og sagði að hann hefði fundið greiðslukort þennan dag en aldrei notað það. Þó fann lögreglan kvittun sem passaði við eina af ólögmætu færslunum.

Jones var ákærður fyrir þjófnað á greiðslukorti, misnotkun á persónuupplýsingum og svik í tengslum við kreditkort – þar sem hann notaði kortið oftar en tvisvar eða fyrir meira en 100 dollara.

Chuck E. Cheese gaf út yfirlýsingu í gær þar sem fram kom að fyrirtækið hefði brugðist við innan húss:

„Við erum meðvituð um atvik þar sem hlutastarfandi starfsmaður var handtekinn á starfsstöð okkar í Tallahassee miðvikudaginn 23. júlí. Við höfum gripið til viðeigandi aðgerða varðandi viðkomandi starfsmann.“